УИХ-ын 2024 оны ээлжит сонгуульд оролцох 19 нам, хоёр эвслээс тойрогт нэр дэвших 985, жагсаалтаар нэр дэвших 385, нийт 1370 нэр дэвшигчийн баримт бичгийг хүлээн авсан тухай Сонгуулийн ерөнхий хорооноос мэдээллээ.

Энэ жилийн сонгуульд оролцохоор бүртгүүлсэн Гэр хороолол хөгжлийн нам, Дэлхийн монголчууд нам, Монголын либерал нам нэр дэвшигчдийн баримт бичгийг хуульд заасан хугацаанд ирүүлээгүй байна. Мөн Ардчилал шинэчлэлийн нам энэ удаагийн сонгуульд оролцохгүй гэдгээ мэдэгджээ.

Үндэсний аудитын газарт энэ удаагийн УИХ-ын ээлжит сонгуульд 77 иргэн бие даан нэр дэвших материал ирүүлсэн ч хоёр иргэн ирүүлэхээс татгалзжээ. Одоогоор СЕХ-нд иргэн бие даан нэр дэвших баримт бичгээ өгөөд байна. Тухайн нэр дэвшигчийн баримт бичгийг СЕХ хянаж үзээд ирэх сарын 1-ний өдөр шийдвэрлэн тогтоол гаргах юм. Түүнчлэн аливаа бие даан нэр дэвшигчийг бүртгэхээс татгалзвал зургаадугаар сарын 3-наас өмнө зөрчлийг арилгасны үндсэн дээр дараагийн хүнийг бүртгэх боломж бүрдэх юм байна. Дахин ирүүлсэн баримт бичгийг зургаадугаар сарын 10-наас өмнө хянаж, бүртгэх эсэхийг эцэслэх юм.

Ирэх сарын 10-ны өдөр бүх нэр дэвшигчдэд үнэмлэх гардуулснаар сонгуулийн сурталчилгаа албан ёсоор эхлэнэ.