Эрх баригчид 2 их наядаар төсвийг нэмэгдүүлэх төсвийн тодотголыг батлах гэж байна. Үүний үр дүнд инфляц 2 хувиар нэмэгдэнэ гэсэн тооцооллыг шинжээчид гаргаад байгаа. Ийнхүү парламент Засгийн газрын шахалтаар үнийн өсөлтийг өдөөх гэж буй цагтай давхца шатахууны импортлогч компаниуд АИ92 төрлийн бензиний үнийг 560 төгрөг буюу 20 орчим хувиар огцом нэмэгдүүлэв. Өнгөрсөн наймдугаар сард шатахууны үнийг тогтвортой байлгах үүднээс шатахуун импортлогчдод тодорхой дэмжлэг үзүүлсэн талаар мэдээлэл гарч байсан. Гэвч энэ нь түр зуур гал унтраах зориулалттай байв. Харин өдгөө импортлогчид ч, төр ч аль аль нь үнэ барих асуудлыг хаяж буй бололтой.
Энэ бүхний дүнд жил бүрийн намрын улиралд үнийн өсөлт буурдаг хандлага өнөө жил давтагдахгүй нь тодорхой боллоо. Шинэ ургацын ногоо гарч, мал таргалж, малчид тариаланчид өвөлдөө бэлддэг цагаар нийлүүлэлт нэмэгддэг тогтолцоо манайд олон жил болсон юм. Тийм ч учраас намрын налгар цагаар үнэ бага зэрэг буурдаг сиймхийг ашиглан улстөрчид, бодлого тодорхойлогчид үнийн өсөлт саарах тооцоолол гарган төсөөлөл танилцуулж, ард иргэдийг тайвшруулж ирсэн.
Тэгвэл өнөөдөр ямар байна вэ? 2026 оны наймдугаар тогтворжих хандлагатай байсан инфляц есдүгээр сард  өмнөх оны мөн үеэс 12.9 хувьд хүрч эрчимжээд байгааг статистик харуулж байна. Энэ нь бараа бүтээгдэхүүний үнийн өсөлт сууриараа нэмэгдэж буйтай холбоотой. Шатахуун түлшний үнэ өөрөө эдийн засгийн суурь үнэ учраас өргөн хэрэглээний бараа бүтээгдэхүүний өртөгт шууд нөлөөлдөг.
Тухайлбал, өнгөрсөн жилийн хугацаанд тээврийн бүлгийн үнэ 15.2 хувиар өсөж, инфляцын 2.2 нэгж хувийг дангаараа бүрдүүлсэн байна. Улаанбаатар хотод АИ92 төрлийн шатахууны үнэ өнгөрсөн наймдугаар сард 3,040 төгрөгт хүрэхэд 2025 оны мөн үеэс 17.4 хувиар өссөн дүн харагдаж байж. Энэ л дангаараа инфляцыг 2.2 хувь өсгөсөн гэсэн үг. Тэгвэл шатахуун импортлогч компаниуд энэ төрлийн шатахууны үнийг өнгөрсөн шөнө дахин 20 хувиар нэмснээр үнийн өсөлтийг улам бүр өдөөх нь тодорхой боллоо.
Шатахууны үнийг дагаад өргөн хэрэглээний бараа бүтээгдэхүүний үнэ өсдөг жишиг бий. Хүнсний бараа, ундаа, усны бүлгийн үнэ жилийн өмнөхөөс 20.8 хувиар өсөж, ерөнхий инфляцад хамгийн өндөр буюу 5.6 нэгж хувийг эзэлж байна. Үүний дотор мах, махан бүтээгдэхүүний үнэ 46.9 хувиар огцом өссөн нь хамгийн гол нөлөө үзүүлжээ. Үхрийн мах жилийн дотор 48.4 хувь, хонь, ямааны мах 58.5 хувиар өссөн байна. Махны үнэд тээврийн зардал томоохон хувь эзэлдэг гэхээр эдгээр статистик мэдээлэл дахиад ч өснө. Хамгийн харамсалтай нь, энэ бүхэн зүгээр нэг тоо, статистик биш юм. Энэ бол борог монголчуудын амьдралд ирэх өвөл хүчтэй цохилт ирэх томоохон дохио билээ.