Гэвч богино хугацааны хүчин зүйлс, ялангуяа АНУ-д үнэ өндөр байгаагаас ашиг олох зорилгоор худалдаачдын тус улс руу энэ онд нийлүүлсэн олон зуун мянган тонн зэсийн асуудал гол анхаарлын төвд ороод байна. Зэсийн импортод татвар ногдуулах шаардлагатай эсэх талаарх дүгнэлт бүхий тайланг Худалдааны яамнаас Цагаан ордонд танилцуулах хугацаа өнгөрөөд хоёр сар орчим болж байгаа хэдий ч зах зээл уг татварыг тогтоох магадлалыг үнэд тусгасаар байна.

Иран дахь мөргөлдөөнөөс эхлээд дэлхий даяар их хэмжээний хөрөнгө оруулалт шаарддаг үйлдвэрлэлийн салбарт дарамт учруулах АНУ-ын зээлийн хүүгийн өсөлт зэрэг макро эдийн засаг, геополитикийн сөрөг хүчин зүйлс нэмэгдэж буй хэдий ч зэсийн үнэ өссөөр байна. Үнэ өндөр байх нь худалдан авагчдыг өөр хувилбар хайхад хүргэж, хэрэглээнд сөргөөр нөлөөлж болзошгүй ч одоогоор эрэлтийн талын ийм дарамт нь зэсийн үнийн өсөлтийг сааруулж чадаагүй байна. АНУ руу чиглэсэн зэсийн импорт дээд түвшинд хүрсэн нь Нью-Йоркийн “Comex” бирж дээр арилжаалагддаг зэсийн фьючерс гэрээний үнэ (премиум) тогтмол өндөр байсантай холбоотой юм. Энэ нь Ерөнхийлөгч Трамп өнгөрсөн оны хоёрдугаар сард зэсэд гаалийн татвар ногдуулах санал гаргаснаас хойш арилжаа эрхлэгчдэд арбитраж буюу үнийн зөрүүгээс ашиг олох томоохон боломжийг олгосон байна. Гаалийн татвартай холбоотой энэхүү арилжаа нь дэлхийн нөөцийг шавхахад хүргэсэн бөгөөд үр дүнд нь өнгөрсөн сард Лондонгийн Металлын Бирж (LME) дээр зэсийн нийлүүлэлтийн хомсдол үүсэж, арилжааны үндэс болдог нөөц нь буурчээ. Шинэ нийлүүлэлтүүд нөхцөл байдлыг тодорхой хэмжээнд зөөлрүүлсэн хэдий ч LME дээрх спот үнэ нь гурван сарын хугацаатай фьючерс гэрээний үнээс хамаагүй өндөр хэвээр байна. Энэхүү нөхцөл байдлыг "backwardation" (ирээдүйн үнэ нь одоогийн үнээс доогуур байх) гэж нэрлэдэг бөгөөд энэ нь эрэлт нийлүүлэлтээсээ давж байгааг илтгэдэг.

Зэсийн үнийн өсөлт нь дэлхийн томоохон уул уурхайн компаниудад томоохон давуу тал болсон бөгөөд тэд эрэлтийн урт хугацааны өсөлт хүлээгдэж буй энэхүү металлын зах зээлд оролцоогоо нэмэгдүүлэх хүсэлтэй байгаагаа удаан хугацаанд илэрхийлсээр ирсэн.