Итали улсаас Монгол Улсад суугаа Элчин сайдын яамнаас Монгол Улсад анх удаагаа сэргэн мандлын үеийн суут зураач Караваджогийн “Мариа Магдален”-ийн сонгодог зураг эх хувиараа үзэгчдийн хүртээл  болж байна. Чингис хааны музейд ирэх зургаадугаар сарыг дуустал нийтийн хүртээл болох юм.

Ирэх онд Итали-Монголын хооронд дипломат харилцаа тогтоосны 55 жилийн ой тохиох бөгөөд Караваджогийн зургийг дэлгэж байгаа нь энэ ойг угтсан соёлын арга хэмжээ юм байна. Энэхүү сонгодог зургийг үнэ төлбөргүй үзэх боломжтой гэдгийг Италийн Элчин сайдын яамнаас мэдээллээ.

Монгол үзэгчдийн хүртээл болох энэхүү зургийг суут зураач маань 1606 онд зурж байсан юм. Энэхүү зураг олон жилийн турш нууцлаг байсан бөгөөд бусад зураачийн хуулбар зургаас л мэддэг байжээ. Ийнхүү 2014 онд хувийн цуглуулгаас эх хувилбараар нь олсон байна.