Сүүлийн нэг жилийн хугацаанд гаднын өндөр дээд хэмжээний айлчлал шил дараалан тохиов.  Тухайлбал Польш, Францын төрийн тэргүүн, Их Британийн Гадаад хэргийн сайд Монголд айлчлав даа. Айлчлалын албан мэдээг харвал “газрын ховор элемент” гэх үг анхаарал татна. Орос-Украины цэрэг дайны ажиллагаатай холбоотойгоор уул уурхайн салбарт Оросын хамаарлаас гарах бодлогыг Европын холбооны гишүүн улсууд баримтлах болсон. Тэр дундаа цахилгаан автомашин, роботжуулалт, ухаалаг төхөөрөмж зэргийн гол түүхий эд болох лити, кобальт зэргийг олборлох, хамтран ажиллах сонирхол нэмэгдсэн билээ. Тийм ч учраас Персийн булангийн улс орнууд, Төв Азийн таван улс, Зүүн ази тэр дундаа Монгол Улстай харилцаа, хамтын ажиллагааг өргөжүүлэх шаардлага урган гарчээ. Зөвхөн Европын холбоо ч биш түүний холбоотон болох Өмнөд Солонгос, Япон ч энэ зүгт хараагаа бэлчээх болсон.

Сүүлийн үед Өмнөд Солонгосын хэвлэл мэдээллийн хэрэгслүүд Монгол Улстай хамтын ажиллагааг өргөжүүлэх тухай мэдээлсээр байна. Өмнөд Солонгосын хувьд Монгол Улсын гуравдагч хөршийн бодлогын хүрээнд харилцаагаа шинэ шатанд гаргах сонирхол бий. Сүүлийн үед Өмнөд Солонгос улс манай улстай олборлох үйлдвэрийн чадавхыг сайжруулах зорилгоор Хөгжлийн албан ёсны тусламж үзүүлэх алхмуудыг ээлж дараатай хийсээр байгаа. Ардчилсан чиг баримжаатай, АНУ-тай харилцаа сайн гэгдэх Монгол Улстай хамтран ажиллах нь газрын ховор элементийн салбарт хамтран ажиллах боломжтой гэдгийг мэргэжилтнүүд дүгнэж байна. АНУ-ын хувьд Энэтхэг-Номхон далайн бодлогын хүрээнд холбоотон Япон, Өмнөд Солонгосоос гадна Төв болон Зүүн Азийн улс орнуудтай харилцаагаа сайжруулах хэтийн бодлого баримталж буй. Өмнөд Солонгосын хувьд газрын ховор элементийн салбарт Хятадаас ихээхэн хамааралтай. Чухам тийм учраас стратегийн ач холбогдолтой газрын ховор элементийн салбарт шинэ түнш хайсаар байна.

Өнгөрсөн оны долоодугаар сард Өмнөд Солонгосын Гадаад харилцааны дэд сайд И Ду Хун Монгол Улсад айлчилсан. Айлчлалын үеэр хобр тал эдийн засгийн харилцаагаа өргөжүүлэх талаар тохиролцсон юм. Ялангуяа хоёр улсын Засгийн газар эрдэс баялгийн салбарт хамтран ажиллана гэдгийг онцолсон билээ. Түүнчлэн дээр дурдсан Хөгжлийн албан ёсны тусламж үзүүлэх гэрээ байгуулсан юм. Улмаар 2023 оны 11-р сард Монгол-Өмнөд Солонгосын хамтарсан газрын ховор элементийн салбарт хамтран ажиллах хороо байгуулагджээ. Цар тахлаас хойш хоёр улсын уул уурхайн салбарын худалдаа эрс нэмэгдсэн дүн мэдээ байна. Тухайлбал 2018-2024 оны хооронд хоёр талын худалдаа дунджаар 53 сая ам.долларт хүрчээ. Тийм ч учраас Өмнөд Солонгосын хувьд уул уурхай, эрдэс баялаг тэр дундаа газрын ховор элементийн салбарт Монгол Улстай хамтрах бодлого баримтлах болжээ.

Өмнөд Солонгосын хувьд технологийн хөгжлөөр тэргүүлдэг. Тэр ч утгаараа хамгийн том түүхий эд болох газрын ховор элементийн салбарт хамтран ажиллахаар болж Засгийн газар хоорондын хамтарсан хороо байгуулсан түүхтэй. АНУ-ын тогтоосон Энэтхэг-Номхон далайн үзэл баримтлалын нөлөөгөөр Өмнөд Солонгос улс ч гадаад бодлогын үзэл баримтлалаа шинэчилж, уул уурхайн салбарт шинэ түнш хайж эхэлсэн гэдгийг мэргэжилтнүүд онцолж байна. Зөвхөн олборлох үйлдвэрийн салбарт хөрөнгө оруулаад зогсохгүй Өмнөд Солонгосын зах зээлд Монголын компаниудыг нэвтрүүлэх сонирхол ч бий. Тухайлбал мэдэээл, харилцаа холбоо, технологи, цахим үйлчилгээний салбарт хамтран ажиллах боломж бийг Өмнөд Солонгосын тал онцолж байна.