Монгол Улсын 2026 оны эхний хагас жилийн эдийн засгийн тойм үзүүлэлтээр ханшийн хүндхэн сорилттой тулгараад буй уул уурхайн салбарын удаашралтыг хөдөө аж ахуйн салбарын хурдацтай өсөлт нөхжээ.
Үндэсний статистикийн хорооноос мэдээлснээр, Монгол Улсын дотоодын нийт бүтээгдэхүүн (ДНБ) 2025 оны эхний хагас жилд 5.6 хувиар өссөн байна. Үүний 3.6  нэгж хувийг хүнс, хөдөө аж ахуй, хөнгөн үйлдвэрийн салбарын өсөлт дангаараа бүрдүүлсэн. Хүнс, хөдөө аж ахуйн дараа барилгын салбар 1, уул уурхай 0.1 нэгж хувийн өсөлтөөр тус тус удаалсан байна.
Эргэн сануулахад, хөдөө аж ахуйн салбарын ДНБ өнгөрсөн 2023 онд -1.3 хувь, 2024 онд -3.6 хувиар буурсан үзүүлэлттэй гарсан байдаг. Байгалийн давагдашгүй хүчин зүйл болох зудын улмаас малын тоо толгой олон саяар хорогдсон нь хөдөө аж ахуйн салбарын энэхүү агшилтад нөлөөлсөн гол хүчин зүйл байлаа. Тэгвэл хөдөө аж ахуйн салбар ийнхүү богино хугацаанд сэргэж, тогтворжсон нь Монгол Улсын Ерөнхийлөгчийн санаачилсан “Хүнсний хувьсгал”, “Атрын IV аян”, “Цагаан алт” тэргүүтэй төрөөс мал аж ахуй, газар тариалан, боловсруулах үйлдвэрийг дэмжих бодлогын хөтөлбөрүүд амжилттай хэрэгжиж байгаатай холбоотой гэдгийг мэргэжилтнүүд онцолж байна.
Цаашид Монгол Улс эдийн засгаа ганц уул уурхайд түшиглэсэн бус солонгоруулах гол тулгуур болох хөдөө аж ахуйн салбарын тогтвортой өсөлтийг хадгалахын тулд зөвхөн мал аж ахуйд тулгуурлахаас илүүтэйгээр хүнсний боловсруулах үйлдвэр, экспортыг дэмжсэн цогц бодлого хэрэгжүүлэх шаардлагатай. Ингэснээр хөдөө аж ахуй зөвхөн амьжиргааны эх үүсвэр биш, эдийн засгийн гол тулгуур багана болон хөгжих боломжтой юм.
Засгийн газар 2026 оны төсвийн төсөлдөө эдийн засгийн өсөлтийг 5.5 орчим хувьд хүрнэ гэж тооцоолсон бөгөөд хөдөө аж ахуйн салбарын тогтвортой хөгжил голлох үүрэг гүйцэтгэнэ гэж үзэж байгаа аж. Үүний тулд цаг уурын өөрчлөлт, зах зээлийн хэлбэлзэлд тэсвэртэй, дотоодын хүнсний хангамжийг баталгаажуулахуйц хөдөө аж ахуй, хөнгөн үйлдвэрлэлийг хөгжүүлэх шаардлага зайлшгүй тулгарч буй.