Сүүлийн жилүүдэд олны анхаарал татсан хэргүүд ихэнхдээ хэрэгсэхгүй болох, эсвэл цагаатгагдаж дуусаж байгааг бид тодоос тод харсаар байна. Нүүрсний хулгай, төмөр зам гээд дуулиант хэргүүд хөвөрсөөр байгаа энэ цаг үед шүүх нь шударга байж, хараат бус, эрх мэдэлтнүүдийн нөлөөллөөс ангид байж чадах уу гэдэг тун эргэлзээтэй болж. Ямар сайндаа албан тушаалтанд үйлчилдэг шүүх гэсэн яриаг иргэд зохиосон хэрэг огт биш юм. Шүүхэд нөлөөлсөн, шүүгч авлига хахууль авсан нь нотлогдсон бодитой жишээнүүд олон бий. Энэ талаар ч олон нийт шуугисаар байна.

Саяхан Ерөнхий сайд болон Улсын Дээд шүүхийн Ерөнхий шүүгч нар ам муруйж шүүгч нарын авлигын асуудлыг Ерөнхий сайд илчлэх талаар яригдсан тухай нийгэм шуугиад өнгөрлөө. Үүнээс үзвэл шүүхэд одоо ч “но” байсаар байна гэх хардлага төрж байна.

Иргэд шударга шүүхэд итгэх итгэлээ алдаж тамираа барж байгаа энэ үед  хотын дарга Д.Сумъяабазарын шүүхэд нөлөөлж байна гэх мэдээлэл сонсогдох боллоо. Асуудлыг тодруулбал, ах дүү 2 иргэнээс тусламж хүсэж зээл авсан байх юм. Харин зээлээ эргэн төлөх болоход хэлсэн яриснаасаа буцаж тусалсан хүмүүсээ айлган сүрдүүлж дарамтлаж улмаар асуудлыг шүүхэд нөлөөлөх замаар замхруулж байгаа гэх шуум эртнээс явах болсон.

Бүр шүүхээр маргаан нэгэнт шийдвэрлэгдэж, өөрсдөө хүлээн зөвшөөрсөн байтал шүүхийн шийдвэрт 10 гаруй удаа гомдол гаргаж, эцэст нь эрх дархаа ашиглаж, өмнөх 9 удаагийн хариуг гэнэт өөрчлүүлж буй нь шүүх хараат бус байж зөвхөн хуульд захирагдах зарчим алдагдсан байна гэдгийг илтгэж байна.

Хачирхалтай нь, хотын дарга маань өөрөө хүлээн зөвшөөрөөд гарын үсгээ зурчихсан зүйлээ үгүйсгэж, хэлсэн амласнаасаа буцаж буй нь бөх хүний хариуцлагаас зугтах уран мэх гэлтэй.

Шүүхийн тухай хуулийн шинэчилсэн найруулгаар шүүх эрх мэдлийг аливаа этгээдээс хараат бусаар хэрэгжүүлэх зарчмыг тодорхой суулгаж хуульчилж өгсөн. Гэтэл өнөөдөр эрх мэдэлтнүүд шүүх хуулийн системийг амин хувийн ашиг сонирхлоо гүйцэлдүүлэх зэвсэг болгон ашиглаж байгааг нэг мөр цэг тавихгүй бол энэ нийгэмд хэзээ ч шударга ёс гэж тогтохгүй. Ийм тодорхой хэргүүд дээр АТГ, холбогдох газрууд нь хараад арга хэмжээ авч байх ёстой. Хэвлэл мэдээлэл, олон нийт ч гэсэн үнэний талаас нь мэдээллэж, шүүхийн хараат бус байдал, хариуцлага ба ёс зүйг нэмэгдүүлэх ёстой. Иргэдийн мэдээлэл, гомдлын мөрөөр эдгээр илэрхий тодорхой асуудал дээр АТГ, шүүх, цагдаа нь хэрхэн яаж ажиллахыг одоо бид харах л үлдэж байна.