Монгол Улсын төсвийг Хэнтийн ба бусад гэж ангилдаг болсон. Ирэх 2023 оны төсөвт Хэнтийн аймгийн төсөв дангаараа 10 аймгийнхаас давж байгаа. Энэ бол тойргоос сонгогддог гишүүний хувьд ашиг сонирхлын зөрчил. Нийт дүнгээрээ дан ганц Хэнтий аймагт 271 тэрбумыг тавьсан олон нийтийн шүүмжлэлийг дагуулаад байна. Тэгвэл 2022 онд тус аймагт 214 тэрбум төгрөгийн хөрөнгө оруулалт хийж байжээ. Улмаар 2023 оны төсөвт нэг ч төгрөгийн шинэ хөрөнгө оруулалт тавихгүй тайлбарын ард Хэнтий аймагт өнгөрсөн хугацаанд эхлүүлсэн олон хөшөөний мөнгийг суулгачихаж. Гэвч энэхүү хөрөнгө оруулалтын дийлэнх нь хэнтийчүүдийн төлөө бус хэсэг бүлэг хүний тендерийг дэмжсэн байх магадлал өндөр. Учир нь Хэнтий аймагт хийх хөрөнгө оруулалт дотор Ерөнхий сайд Л.Оюун-Эрдэнээр авгайлах болсон хөшөөт цогцолборууд жин дарж байна.

Ерөнхий сайд Л.Оюун-Эрдэнэ өөрийн 2 удаа сонгогдсон тойрог Хэнтий аймагт хэдэн хөшөө босгосноор Монголд 400 сая жуулчин авчирч чадна гэдэг ам гарснаас цагаасаа хойш төсвийн нутаг руугаа цутгах болсон.  Улмаар Хэнтий аймгийн Батноров суманд "Андлалын өргөө"  хөшөө байгуулах замдаа олон нийтийн эсэргүүцэлтэй тулгаран нурааж, татвар төлөгчдийн олон тэрбум төгрөгийг салхинд хийсгэж байлаа. Өдгөө "Андлалын өргөө" хөшөөтэй адил хэд хэдэн байгууламж Хэнтий аймагт байгуулж байгаа. Хэнтий аймгийн Дэлгэрхаан суманд баригдаж буй “Монголын нууц товчоо” музейд 5.1 тэрбум, Биндэрийн “Их хуралдай” өргөөнд 2.5 тэрбум, Норивлон суман дахь  “Шихихутаг их засаг” цэцэрлэгт хүрээнд 312 сая төгрөг зарцуулахаар 2023 оны төсвийн төсөлд суулгаад байна. Дээр нь "Монголын нууц товчоо" руу цилгаан татахад зориулан 350 сая төгрөгийг тусдаа тавьсан. Гэтэл нийслэл Баянгол дүүрэг дэх ерөнхий боловсролын 19 дүгээр сургуулийн барилгыг буулгаж, шинээр барихад 925 сая төгрөг, хүн амын хамгийн их төвлөрөлтэй Баянзүрх дүүргийн 26 дугаар хороонд хүүхдийн цэцэрлэг байгуулахад 848 сая төгрөгийн санхүүжилт тавьсан байх жишээтэй. Уг нь 19 дүгээр сургуулийн нийт өртөг 7.8 тэрбум, 26 дугаар хорооны цэцэрлэгийнх 5.4 тэрбум төгрөг юм билээ. Эдгээрийн сургууль, цэцэрлэгийн аль нэгийг “Монголын нууц товчоо” болон “Их хуралдай” цогцолборын мөнгөөр ирэх онд багтаан 100 хувь ашиглалтад оруулах боломжтой аж. Энэ мэт 2023 оны төсвийн хуваарилалт нутаг усаар алагчилсан, хямралын үеийнх гэдэг утгаа бүрэн алдаад байгаа учраас олон нийт шүүмжлээд байгаа юм.  Цаг хугацааны хувьд “Шихихутаг нууц товчоо” 2019 онд, “Монголын нууц товчоо” болон “Их хуралдай” цогцолборын ажил 2020 онд эхэлж байжээ. Өөрөөр хэлбэл, эдгээр хөшөөний шавыг тавьсан цагаас эхлэн төсвийн мөнгө урссаар байгаа гэсэн үг.

Үүнээс гадна цэцэрлэг, сургуулиас илүү хөшөө дурсгалд хөрөнгө хаясан 2023 оны төсөвт хэмнэлтийн шинжтэй зүйлс оруулсны нэг нь хүүхдийн мөнгө тэтгэмж. Засгийн газар ирэх жилээс аль өрхүүдийг амьжиргааны түвшнээс нь хамаарч хүүхдийн мөнгөнөөс хасахаар болоод байгаа юм.