Монгол Улсын Хөгжлийн банк БНСУ-ын актив удирдлагын корпорац (KAMCO)-тай өнөөдөр (2025.06.18) хамтран ажиллах санамж бичиг байгуулж, Хөгжлийн банкны гүйцэтгэх захирал З.Нарантуяа, KAMCO корпорацын гүйцэтгэх захирал Жон Кук И гарын үсэг зурлаа.

Энэхүү санамж бичгийг байгуулснаар Монгол Улсын Хөгжлийн банкны чанаргүй активыг бууруулахад KAMCO корпорац хамтран ажиллах эхлэл тавигдаж байгаа юм. Санамж бичгийн хүрээнд Хөгжлийн банкны чанаргүй активыг бууруулахаас гадна мэргэжилтнүүдийг сургах, бодлогоын болон хууль эрх зүйн зөвлөмж өгөх зэргээр хамтран ажиллана.

Монгол Улсад банк, санхүүгийн салбарын чанаргүй зээлийг бууруулахад КАМСО байгууллага чухал болохыг Хөгжлийн банкны гүйцэтгэх захирал З.Нарантуяа онцлоод төслийг зөв үнэлж дүгнэх, асуудалд орсон төслийн бүтцийг шинэчилж, зөв удирдах, бусад хөрөнгө оруулагчдад санал болгох зэрэг чиглэлээр хамтран ажиллах хүсэлтэй байгаагаа илэрхийллээ. Түүнчлэн тэрбээр Активын удирдлагын тухай хуульд ач холбогдол өгч, батлуулахад идэвхтэй оролцохоо хэлээд банк бүр дэргэдээ активын бүтцийн газар байгуулан нөөцөө үрэхгүйгээр урагш харж ажилладаг болоход КАМСО корпорацын туршлага чухал болохыг онцлов.

KAMCO корпорацын гүйцэтгэх захирал Жон Кук И Монгол Улсын Хөгжлийн банктай хамтын ажиллагаагаа албан ёсоор эхлүүлж байгаад талархаж байгаагаа мөн илэрхийлээд мэргэжилтнүүдийг чадавхжуулж, бодлогын зөвлөмж өгч, үр дүнтэй хамтран ажиллахаа илэрхийллээ.

KAMCO корпорац нь санхүүгийн хямралд өртсөн байгууллагуудад үр ашигтай хөрөнгийн удирдлагын арга зам санал болгох, чанаргүй зээлийн асуудлыг шийдвэрлэх, бизнесийн бүтцэд өөрчлөлт хийх зэргээр тухайн байгууллагыг хэвийн үйл ажиллагаагаа үргэлжлүүлэх, өр төлбөрөө төлөхөд нь дэмжлэг үзүүлдэг БНСУ-ын Засгийн газрын агентлаг юм. Өдгөө 60 гаруй жилийн туршлагатай тус корпорац БНСУ-ын санхүүгийн томоохон хямралуудын үед чанаргүй зээлүүдийн эргэн төлөлтийг сэргээхэд чиглэсэн 290 их наяд вонтой тэнцэх хэмжээний сан байгуулж, чанаргүй зээлийг худалдан авч, үр ашигт удирдлага хэрэгжүүлэх замаар улсаа хямралаас гаргасан түүхтэй.

Тухайлбал, БНСУ-ын цахилгаан авто машины тэргүүлэгч үйлдвэрлэгчдийн нэг “Daewoo” групп 1993 онд дэлхийн зах зээлд үйл ажиллагаа явуулж эхлэх үед олон улсын зах зээлд гарах процессийн удаашралаас үүдэн хямралд орж, зээлээ төлөх боломжгүй болоход нь KAMCO тус группт бүтцийн өөрчлөлт хийж, үйл ажиллагааг нь жигдрүүлэхэд амжилттай хамтран ажиллажээ. 2003 он гэхэд KAMCO өөрийн 1997 оноос хойш худалдан авсан чанаргүй зээлийн багцын 50-аас дээш хувийг мөнгөжүүлсэн байна. Үүний дараа үлдсэн чанаргүй зээлийн 81.2%-ийг Daewoo группийн 11.4 их наяд вонын чанаргүй хөрөнгө дангаар бүрдүүлж байсан байна. 2009 онд KAMCO-ийн тусламжтайгаар Daewoo групптэй холбогдох 11 салбар компанийн үйл ажиллагаа сэргэснээр уг хөрөнгө эргэн төлөгджээ.

Монгол Улсын Хөгжлийн банк хэвийн үйл ажиллагаа эхлүүлэхээр олон шинэчлэлийг хийн ажиллаж буй. Юун түрүүнд чанаргүй активаа бууруулах зорилтын хүрээнд ийнхүү олон улсын хамтын ажиллагаагаа өргөжүүлж байна.