Засгийн хуралдаанаар өнөөдөр хэлэлцсэн асуудлыг Нийслэлийн засаг дарга бөгөөд Улаанбаатар хотын захирагч Х.Нямбаатар танилцууллаа. Уг хуралдаанаар хотын төлөвлөлтийн асуудлыг хөндөн ярилцжээ. Ингэхдээ алслагдсан гурван дүүрэг болох Багануур, Багахангай, Налайх дүүргүүдийг дагуул хот болон төлөвлөж, “Шинэ Зуунмод” хотыг төлөвлөх тухай асуудлыг хөндөн ярилцжээ.

“Ерөнхий сайдын зүгээс засаг захиргаа, нутаг дэвсгэрийн нэгжийн шинэчлэлт хийх хуулийг боловсруулах үүрэг, чиглэлийг авлаа. Ингэснээр Налайх, Багахангай, Багануур дүүрэг дагуул хот байдлаар хөгжих эрх зүйн үндэс бүрдэнэ. Улаанбаатар хотын төвлөрлийг сааруулахад Төв аймгийн нутаг дэвсгэр дээр "Шинэ зуун мод" хотын эрхзүйн байдлын хуулийг хамт өргөн мэдүүлэхээр төлөвлөж байна” гэж Нийслэлийн засаг дарга бөгөөд Улаанбаатар хотын захирагч Х.Нямбаатар ярьлаа.

Шинэ Зуунмод хотод орсон орлогын 20 хувийг Төв аймагт, 80 хувийг Улаанбаатар хотын хөгжилд зарцуулах бөгөөд150 мянган хүний суурьшил бүхий хотыг байгуулах хуулийг хамтад нь өргөн барихаар болжээ.