Монгол Улс сүүлийн зургаан жилд анх удаа эрчим хүчний нэмэлт эх үүсвэртэй болох оролдлогоо хийж байна. Тэр нь мөн л 6-7 жил яригдсан Амгалан дахь дулааны станцыг өргөтгөх асуудал. Уг төслийн нээлтэд сүүлийн 3 жил шахуу тууз хайчилж чадаагүй Монголын бүхий л дарга нар оролцов. Энэ нь Ерөнхий сайд Л.Оюун-Эрдэнэ өөрийн биеэр нээлтийн ёслолд морилж, бараг шинээрээ шахуу мартагдах магадлалтай болсон “Шинэ сэргэлтийн бодлого”-oo хэдэнтэй сануулснаас харагдана. Улаанбаатар хот өнөөгийн байгаа дулаан хангамжийн нөөцөөрөө ирэх өвөлтэй золговол бараг хөлдөж мэдэх эрсдэлтэй нөхцөлд энэ удаагийн дулааны станцын өргөтгөл яалтчгүй ач холбогдолтой төсөлд тооцогдож байгаа юм. Бүр нарийн ярьвал, өнгөрсөн 7 жилийн турш дуншсан Амгалангийн дулаан станцыг өргөтгөж, давхар нэн шаардлагатай байгаа цахилгаан үйлдвэрлэх хүртэл хөгжүүлэх эхний алхмыг Ерөнхий сайд Л.Оюун-Эрдэнэ өөрийн биеэрээ эхүүлж буйгаа олон нийтэд харуулах шаардлага хаа хаанаа байсан нь мэдээж. Иймээс Ерөнхий сайд, МАН-ын дарга Е.Оюун-Эрдэнэ намынхаа гишүүдийн тоносон Хөгжлийн банкны багахан үлдэгдлээр Амгалангийн станцыг өргөтгөх шийдвэр гаргаснаа ёслол төгөлдөр танилцууллаа.

Амгалангийн дулааны станцыг анх Ардчилсан намын Засгийн газар 2014 онд шинээр нээсэн нь Монголын эрчим хүчний салбар сүүлийн 40 гаран жилийн хугацаанд хийгдээгүй том бүтээн байгуулалт байсан. Тэгвэл Ерөнхий сайд Л.Оюун-Эрдэнэ Монгол Улс 1986 онд дулааны IV цахилгаан станц баригдсанаас хойш эрчим хүчний нэг ч шинэ эх үүсвэр төрийн зүгээс байгуулж чадалгүй ирсэн гэдгийг энэ удаагийн өргөтгөлөөр үргэлжлүүлж байгаа гэдгийг “Шинэ сэргэлтийн бодлого”-тойгоо уялдуулан тайлбарласан. Ингэхдээ бид эрчим хүчний импортод жил бүр дунджаар 400 гаруй тэрбум төгрөг зарлагадаж байна. Дулааны станцуудын насжилт 35-60 жил, цахилгаан дамжуулах, түгээх сүлжээний насжилт 32-62 жил болж, 40 гаруй хувийнх нь ашиглалтын хугацаа дууссан.
Гэтэл жил бүр Улаанбаатар хотын хүн ам нэг аймгийн хүн амтай тэнцэхүйц хэмжээгээр нэмэгдэж, нэмэлт эх үүсвэрүүдийг шаардаж байна гэсэн. Тиймээс төслийн ерөнхий гүйцэтгэгчээр шалгарсан БНХАУ-ын “Хунан индустриал экүйпмент инсталэйшн” ХХК-тай гүйцэтгэлийн гэрээ байгуулж, 16 сарын хугацаанд хийгдэж дуусах төлөвлөгөөг танилцуулав. Төслийн нийт өртөг 65.6 тэрбум төгрөг. Энэ санхүүжилтийн 85 хувийг Хөгжлийн банкнаас олгохоор Засгийн газрын хуралдаанаас шийдвэрлэсэн.  Гэтэл Хөгжлийн банк өөрөө улстөрчдийн оролцоотойгоор дампуурлын ирмэгт ирсэн гэдгийг та бид мэднэ. Хөгжлийн банкнаас гарсан 3.1 их наяд төгрөгийн зээлийн 1.7 их наяд нь эргэж олдохоосоо өнгөрсөн. Үүн дотор төрийн өмчит компаниудын өр талаас илүүг нь эзэлж байгаа. Энэ хэрэгт хэд хэдэн төрийн албан тушаалтан татагдаж, аавын хаалга татахад бэлэн болсон. Гэсэн ч улсын нийслэлийг ирэх жилүүдэд хөлдөөхгүй байх шаардлага Ерөнхий сайд Л-Оюун-Эрдэнийг Хөгжлийн банкны багахан үлдэгдлийг зарцуулахад хүргэлээ. Харин Тавантолгойн 450 мегаваттын дулааны цахилгаан станц, Багануурын 400 мегаваттын цахилгаан станц гэх мэт эрчим хүчний мега төслүүдийг санхүүжүүлэх Хөгжлийн банкны хөрөнгийг завшсан МАН-ын гишүүддээ хариуцлага тооцож чадаагүй яваа. Өнгөрсөн өвөл Монгол Улсын эрчим хүчний систем өвлийн оргил ачааллын нийт суурьлагдсан хүчин чадлаа бүрэн ашиглаж, нөөц тоноглолгүй ажилласан. Ирэх өвлүүдэд ч импортын эрчим хүчээ нөхөж, цахилгаан дамжуулах шугам, дэд станцууд дээд цэгтээ тултал хална.
 

ЖИЧ: зургийн тайлбарлахад, Монгол Улсын эрчим хүчний системийн 2019 оноос эхлэн өвлийн идэр есийн хүйтэнд ямар ч нөөцгүй бүх чадалдаа тулган ажиллаж байгаа бөгөөд 2022.01.12-ны өдрийн оргил ачаалал 19.00 цагт 1355 МВт хүрч өнгөрсөн оны мөн үеэс 132 МВт-аар, импорт 73 МВт-аар өссөн үзүүлэлт болсон. Энэ үед эрчим хүчний системд ноцтой долголдол гарсан тохиолдолд Монгол Улсын Төв бүсийн бүхэлдээ тог цахилгаангүй болж, нийслэл хот хөлдөх эрсдэлд хүрнэ.