МУИС-аас гаргасан судалгаагаар хэвлэл мэдээллийн салбарыг 112 хууль тогтоомжоор зохицуулж байгаа гэх дүн мэдээ гарчээ. Монгол Улсын хувьд 1998 онд Хэвлэл мэдээллийн эрх чөлөөний тухай хууль баталсан байдаг. Уг хууль нь дөрвөн зүйлтэй. Хэдийгээр пост коммунист улс орнуудаас түрүүлж хэвлэлийн эрх чөлөөг хуулиар тунхагласан ч хэтэрхий ерөнхий гэж гаднын судлаачдаас шүүмжлүүлсээр ирсэн юм.

Хэвлэлийн эрх чөлөөний шалгуур үзүүлэлтээр Монгол Улс 2015 онд 54 дүгээрт эрэмбэлэгдэж байлаа. Харин 2024 онд 109 дүгээрт эрэмбэлэгдэж түүхэн доод түвшиндээ хүрсэн. Хэвлэл мэдээллийн орчны хувьд эдийн засаг, улс төр, хууль, эрх зүйн зохицуулалт, аюулгүй байдал хамгийн сул гэж үнэлэгдсэн юм. Үүгээрээ Монгол Улс ардчилсан бус засаглалтай улс орнуудтай эн зэрэгцэж байна.

УИХ-ын хаврын чуулганаар Хэвлэл мэдээллийн эрх чөлөөний тухай хуулийг хэлэлцэн үзэл баримтлалын хувь хэлэлцэхийг дэмжээд байна. Энэ удаагийн хуульд хэвлэлийн эрх чөлөө болон эх сурвалжаа нууцлах заалтуудыг тусгасан боловч эрх баригчид хэвлэл мэдээллийг үзэмжээрээ сонгон, тендер нэрээр танил талаараа хэвлэл мэдээллийн үйл ажиллагаа явуулах нөхцөл бүрдсэн гэж мэргэжилтнүүд шүүмжилсээр байгаа юм. УИХ-аар үзэл баримтлалын хүрээнд хэлэлцэхийг дэмжсэний хувьд тус хуулийг сайжруулах ажлын хэсэг байгуулагдаад байна.

Ташрамд дурдахад Монголын сэтгүүлчдийн нэгдсэн эвлэл маргааш буюу Дэлхийн хэвлэлийн эрх чөлөөний өдрөөр  "Хэвлэл мэдээллийн эрх зүйн орчин: Хууль эрх зүйн шинэчлэл" илтгэл, хэлэлцүүлэг зохион байгуулахаар болжээ.