Монголбанкны тайланд дурдсанаар гуравдугаар сард ипотекийн зээл хүссэн 716 өргөдөл шинээр иржээ. Ингэснээр зээлд хамрагдах хүсэлтэй иргэийн тоо 16.8% өссөн байна. Ипотекийн шинэчилсэн журмыг хэлэлцэх гэж байгаа энэ үед нэг талаас зах зээлийн эрэлт, нөгөө талаас зээл олгох журам харьцангуй уян хатан болох хүлээлт нь ипотекийн зээл хүсэгчдийн тоог нэмэгдүүлэх үндсэн шалтгаан болсон байх талтай.

Барилга хот байгуулалт, орон сууцжуулалтын яам ойрын хугацаанд ипотекийн зээлийн шинэчилсэн журмыг танилцуулна гэж мэдээлээд байна. Энэ журмаар гэр хороололд баригдаж буй шинэ орон сууц болон дэд төвүүдийн орон сууцны төслүүдэд ипотекийн зээл олголтыг нэмэгдүүлэхээр тусгаж байгаа юм. Үүнтэй уялдуулан Монголбанкны зүгээс тухайн барилгын байршлаас хамааран зээлийн хүүг 6-13 хувьд ялгамжтай тогтоохоор судалж байна.

Өнгөрсөн гуравдугаар сард 721 зээлдэгчид шинээр 204.4 тэрбум төгрөгийн зээл олгосон нь 1.5% өссөн үзүүлэлт аж. Ингэснээр ипотекийн зээлийн үлдэгдэл 9.77 их наяд төгрөгт хүрчээ. Тухайн сард олгосон нийт зээлийн 55.5% нь арилжааны банкны эх үүсвэрээр, үлдсэн 40% нь зургаан хувийн хүүтэй орон сууцны ипотекийн санхүүжилтээр олгосон байна.