-Зөвхөн энэ сард Эрдэнэт үйлдвэр 2 тэрбумаар модны мөчир худалдаж авах тендер зарлав-  

Ерөнхийлөгч У.Хүрэлсүх сүүлийн хэд хоног хоорондоо огт авцалдахгүй хоёр өөр үйл ажиллагаа хийж явна. Тэрбээр өнгөрсөн долоо хоногийн баасан гарагт УИХ, Засгийн газарт Монгол Улс хүнсний хомсдолд орохыг анхааруулсан бол ням гарагт нь тэрбум, тэрбум төгрөг зарлагдаж, модны мөчир, суулгац худалдан авах хөдөлгөөнийг ээлжит удаагаа манлайлав. Өнгөрсөн 2021 оны намраас эхэлсэн энэ хөдөлгөөн татвар төлөгчдийн халааснаас нийтдээ хэдэн төгрөг гаргах нь өөрөө тодорхойгүйтэй адил хэний халаасанд хийсэн нь ч том сэдэв.

Мөн УИХ-аас саяхан баталсан Төрийн хэмнэлтийн хуультай зөрчилдөж байгаа юм. Тухайлбал, хуулийн 13.4.1-т “Улсын төсвөөс орон нутгийн нийтийн эзэмшлийн зам, талбай, олон нийтийн соёл амралтын хүрээлэн, хаягжуулалт, гэрэлтүүлэг, тохижилт хийхийг хориглоно” гээд заачихсан. Тэгвэл нийтийн эзэмшлийн гудамж талбайд ургах эсэх нь тодорхойгүй олон мянган мөчир суулгах нь тохижилт биш гэж үү.

Хуулийн 8.1-т “Цэргийн алба хаагч, прокурор, гадаадын иргэний хяналтын улсын байцаагч, гаалийн улсын байцаагчаас бусад албан хаагч төсвийн болон байгууллагын хөрөнгөөр дүрэмт хувцас худалдан авахыг хориглосон”. Нэгэнт энэ хууль хэрэгжиж эхэлснээс хойш төрийн хэмнэлт хийн, иргэдийн хүнсний хангамжийг нэмэгдүүлэх уриалга гаргаж яваа Ерөнхийлөгч У.Хүрэлсүх өөрөө ч “Тэрбум мод” хэмээх лого бүхий хувцас өмсөн үлгэрлэх эрхгүй болсон гэсэн үг. Магадгүй, хууль хэрэгжихээс өмнө төрийн мөнгөөр худалдаад авчихсан гэж тайлбарлах байх. Гэхдээ төрийн тэргүүн өөрөө Төрийн хэмнэлтийн хуультай зөрчилдөх манлайлал үзүүлэх нь зохимжгүй.

Суулгасан мөчир, суулгац ургахгүй байвал, энэ тохижилт цагаа олоогүй асар их үргүй зардал болж хувирна. Одоо энэ зардлууд хаанаас гарч байгааг аваад үзье. “Эрдэнэт үйлдвэр”, “Оюутолгой”, “Эрдэнэс силвер ресурс”, “Эрдэнэс Тавантолгой”, ер нь стратегийн ордуудыг бүхэлд нь зангидаж Үндэсний баялгийн сан байгуулах учиртай “Эрдэнэс Монгол” нэгдэл бүхэлдээ бут сөөгөнд үндэсний баялгийг зарав. Хэд гэдэг нь сонин биш. Хаанаас гарч ирсэн, ургасан нь мэдэгдэхгүй сая сая мод, бут, сөөгийг түмний мөнгөөр худалдаж авсан. Жишээлбэл, хөтөлбөрийн хүрээнд модны суулгац худалдаж авах тендерээ ил зарлаж байгаа нь Эрдэнэт үйлдвэр. Тус үйлдвэр зөвхөн энэ сард хоёр тэрбум (2,000,000,000) төгрөгийн модны мөчир, суулгац худалдаж авах 10 гаруй тендер зарлажээ. Энэ бол “Тэрбум мод" хөтөлбөрийн зөвхөн нэгээхэн хэсэг. Хэрэв энэ худалдан авалтыг үр дүнтэй гэж үзвэл, ирэх намар Эрдэнэт хот олноо “Ногоон хот" хэмээн өргөмжлөгдөх биз.

Эдийн засагч, шинжээчдийн төсөөллөөр Оросын Украинд хийж буй түрэмгийлэл эцэстээ хүрэхэд урт хугацаа шаардлагатай. Намар гэхэд байдал бүр ч дордож, эдийн засгийн хүндрэлийг дагаад хүнс, шатахуун тэргүүтэй стратегийн бүтээгдэхүүнүүдийн хомсдол улам даамжирч болзошгүйг анхааруулж байна. Гэтэл Ерөнхийлөгчөөр дүйвээнээр даган баяссан яам, тамгын газар, орон нутгийн удирдлагууд төсөвт гол орлого оруулдаг төрийн өмчит компаниуд бүгд ирэх намар "Тэрбум мод" хөтөлбөрийн нэрээр дахиад л мөнгө цацна. Тэр үед хүнсээ дийлэхгүй байгаа иргэд “Мод тарь” гэж зандрахыг жинхэнэ утгаар нь доромжлол гэж хүлээж авна. Цаашлаад өнөөдөр үлгэн салган үйл ажиллагаа явуулж байгаа аж ахуйн нэгжүүдээ “Мод тарь” гэж рекетлэх нь дампууралд хөтлөх биш үү. Доромжлуулсан ард түмэнд яадаг билээ? Мартсанаас, Сэлэнгэ, Дархан, Орхон аймгийн газар тариалан, хүлэмжийн аж ахуйтай танилцаж яваа Ерөнхийлөгч У.Хүрэлсүхдээ мод ямар нөхцөлд ургадаг, яаж ургуулдгийг мэдээд ирэхийг ерөөе.