Канадын эрх баригч Либерал намын даргыг сонгох хуралдаан өчигдөр болж, хуралдаанд оролцсон гишүүдийн 85.9 хувийн саналаар намын даргаар сонгогдлоо. Канадын хууль ёсоор эрх баригч намын дарга нь Ерөнхий сайдын алба хаших тул тэрбээр Жастин Трюдог орлож Ерөнхий сайдын суудалд суух юм. Мэргэжсэн эдийн засагч гэдгээрээ алдартай Марк Карни нь 2008-2013 онд Канадын банкны тэргүүнээр, 2013-2020 онд Английн банкны тэргүүнээр ажиллаж байсан туршлагатай. Канадын Ерөнхий сайд асан Жастин Трюдогийн зөвлөхөөр ковид цар тахлын жилүүдэд ажиллаж байсан юм. Түүнийг Канадын эдийн засгийг ковидын үед хөл алдалгүй авч явсан гэж ихэнх мэргэжилтнүүд дүгнэдэг.

Канадын Ерөнхий сайд Жастин Трюдо улс төрийн хямралын улмаас энэ оны нэгдүгээр сарын 6-ны өдөр албан тушаалаасаа огцорч байгаагаа нийтэд зарласан юм. Учир нь 2024 оны 12-р сарын 16-ны өдөр түүний кабинетийн Сангийн сайд бөгөөд Шадар сайд Синтиа Фрийлэнд албан тушаалаасаа огцорсон нь цаашаагаа үргэлжилж улмаар олон нийтийн санаа бодол ч өөр тийшээ эргэсэн нь Трюдогийн улс төрийн дэмжлэгийг сааруулсан билээ. Жастин Трюдо 2015 оноос хойш Канадын Ерөнхий сайдын албыг хашсан юм.