Эрх баригч хиндү намын тэргүүн, Ерөнхий сайд Нарендра Моди тэргүүтэй Энэтхэгийн ард түмэн шашны цөөнхүүдээ ад үзэн харааж зүхэх нь эрс нэмэгджээ. АНУ-ын Вашингтон төвтэй Индиа Хейт Лаб судалгааны байгууллагын тайлагнаж буйгаар лалын болон христийн шашинтнуудыг чиглэсэн хараал зүхэл 74%-иар өссөн байна. Тухайлбал, 2023 онд шашны цөөнхийг чиглэсэн хараал зүхэл, бүдүүлэг үг хэллэгийн тохиолдол 668 байсан бол 2024 онд 1,165 болж нэмэгдсэнээс харж болох юм. Нийт тохиолдлын 98% хувь нь лалын шашинтнуудыг чиглэсэн байв. Ийнхүү 2024 онд шашны цөөнхийг хараан зүхэх нь түгшүүрийн харанга дэлдэхүйц хэмжээнд хүрсэн нь эрх баригч Бхаратияа Жанат нам болон хиндүгийн үндсэрхэг хөдөлгөөн газар авсантай холбоотой байна гэж тайлан гаргасан Индиа Хейт Лаб анхаарууллаа.

Н.Моди нь өнгөрсөн жилийн сонгуулиар гурав дахиа сонгогдсоноос хойш болон түүнээс өмнөх арав гаруй жилд ч шашны цөөнхийг ад үзэж, хараан зүхсэн хэрэгт олонтаа холбогдож байсан билээ. Энэ нь Энэтхэгийг зөвхөн Хиндү шашинтай улс болгох, шашин хоорондын хагарал үүсгэж, нэгийг нөгөөгөөр залгиулах гэсэн хиндүчүүдийн хэт үндсэрхэг бодлого гэж шүүмжлэгчид буруушаадаг.

Харин Бхаратия Жаната намын зүгээс шашин хооронд ялгаварлан гадуурхах үзэл дэлгэрүүлэхийг санаархдаггүй бөгөөд тус намыг ийн гүтгэх нь Энэтхэг улсын нэрэнд сэв суулгах зорилготой явуулга гэж мэдэгджээ. Тус намын төлөөлөгч Жайвир Шергилл даваа гарагт дээрх судалгааны тайлан гарсны дараа “Энэтхэг улс энх тайван, хэв журам, хүчирхийлэл үл дэлгэрүүлэхийг зорьсон чанга хатуу хуулийн тогтолцоо. Тиймээс улс орны нэр хүндэд халтай анти-индиа мэдээлэл түгээх шаардлагагүй” гэж мэдэгдсэний CNN агентлагт уламжилж байна.

Дээр дурдсан судалгаанаас харахад хиндү шашинтнуудыг дэмжих зорилгоор лал болон христ шүтлэгтнүүдийг ад үзсэн агуулга түгээхдээ “харийнхан, гаднынхан, эзлэн түрэмгийлэгч” гэх зэрэг үг хэллэгийг ихээр ашиглажээ. Мөн өнгөрсөн жил энэтхэг даяар ашигласан хараал зүхлийн 30% Бхаратия Жаната намынхнаас эхтэй бөгөөд энэ нь 2023 оныхоос зургаа дахин их тоо бол намын удирдлагууд нийт 452 удаа хараал зүхлийн үгс ашигласан нь түүнээс өмнөх жилтэй харьцуулахад 350%-иар өссөн үзүүлэлт болжээ.

Энэтхэг улс нь 1.4 тэрбум хүн амтай бөгөөд түүний 200 сая нь лалын шашинтан бол ердөө 27 сая нь христийн шашинтай аж.