Мэргэжлийн боксын хэт хөнгөн жингийн төрөлд олон улсын хэмжээнд чансаа ахиж, од болж явсан ирланд боксчин Жон Күүни өнгөрсөн бямба гарагт тулааны үеэр авсан тархины гэмтлийн улмаас нас барсан талаар түүний менежер мэдэгдлээ. “Амь насныхаа төлөө тэмцэж байсан Жон Күүни маань 28 насандаа амьсгал хурааж, бидэнд нөхөж баршгүй хүнд гарз тохиолоо” хэмээн менежер Марк Данлоп Инстаграм дахь хуудсаараа эмгэнэсэн байна. Мөн ийм харамсалтай явдал болоогүй бол ирландаас ээлжит дэлхийд алдартай тамирчин тодрон улам гялалзах байлаа гэдгийг М.Данлоп онцолжээ.
Ж.Күүни нь Уэльсийн боксчин Нэтэн Хауэллстай энэ сарын 01-нд Бельфастын Улстер танхимд Кельтийн хэт хөнгөн жингийн боксын аваргын цолоо хамгаалах тулалдааны үеэр бэртэл авч есдүгээр үе дээр бие нь муудан эмнэлэгт хүргэгдэн эмчлүүлж байсан аж. Жон Күүни нь өнгөрсөн оны арваннэгдүгээр сард Лиам Гейнортой тоглож, Кельтийн хэт хөнгөн жингийн боксын аваргын бүсийн эзэн болж байжээ.