Монголчууд бидэнд “Солирын од” киногоор эчнээ танил болсон Тайванийн жүжигчин Барби Шю 48 насандаа нас баржээ. Орон нутгийн хэвлэлүүдийн мэдээлж байгаагаар тэрбээр Японд амарч байхдаа томуу нь хүндэрч, хатгалгааны улмаас нас барсан байна.

Түүнийг нас барсан тухай мэдээлэл ням гарагт нэгэн фейсбүүк хуудаст нийтэлсэн ч баталж чадаагүй байсан юм. Улмаар өнөө өглөө түүний менежер Ди Ху “Цагаан сарын баяраар Японд амрахаар ирээд хатгаа нь хүндэрсний улмаас биднийг орхин одлоо...” гэж эмгэнэлдээ дурджээ. Яг одоо Барби Шю-гийн тухай мэдээлэл хятадын “Вейбо” нийтийн сүлжээний хуудасны тренд сэдэв болоод байна.

Тайванийн Тайбэй хотод 1976 оны аравдугаар сарын 6-нд төрсөн тэрбээр 2001 онд “Солирын од” кинонд тоглосноороо алдаршиж, Филиппин, Индонези, Тайланд зэрэг зүүн өмнөд азийн орнуудад алдрын оргилд хүрсэн билээ.