Салван Момика гэгч ирак эр 2023 онд Коран судар шатааж, лалын шашинтнуудын дургүйцлийг төрүүлж байсан бөгөөд саяхан бусдын гарт амиа алдсан талаар Шведийн эрх баригчид мэдээллээ. Тус улсын прокурорын газрын төлөөлөгч CNN агентлагт мэдээлэхдээ С.Момикаг өнгөрсөн лхагва гарагт Стокгольм хотод буудан хөнөөсөн нь тодорхой боллоо. Орон нутгийн цагдаагийнхан лхагва гарагийн орой аллага үйлдсэн байж болзошгүй таван сэжигтэнг баривчлан саатуулаад байна. Уг нь, С.Момика нь пүрэв гарагт ялгаварлан гадуурхах үзлийг дэвэргэсэн хэргээр Стокгольмын Тойргийн шүүхээс ял сонсох гэж байсан аж.

Салван Момика нь 2018 онд Иракаас Шведэд цагаачилсан бөгөөд Коран судар нь ардчилал, ёс зүй, хүний үнэ цэн, хүний эрх, эмэгтэйчүүдийн эрхэнд онц ноцтойгоор аюул учруулж буй тул дэлхий даяар хориглох ёстой гэж үздэг учраас 2023 онд лалын шашны ариун судрыг олон нийтийн өмнө шатааж, эгдүүцлээ илэрхийлж байсан аж