Шибүши, Осаки хотууд хамтран хэрэглэсэн хүүхдийн живх дахин боловсруулах технологи хөгжүүлж, гарсан бүтээгдэхүүнээр нь байгальд ээлтэй ариун цэврийн цаас үйлдэврлэж, худалдаанд гаргаад байна. Ийм ариун цэврийн цаас үйлдвэрлэж, хэрэглэж эхэлсэн нь дэлхий дээр анхны тохиолдол юм. Ийм ч учраас тэргүүлэх зэргийн инновац шингээсэн гэж олон улсын хэвлэлүүд онцолоо. Тус хоёр хотын хэмжээнд хэрэглэсэн живх цуглуулах ажлыг өнгөрсөн оны дөрөвдүгээр сараас эхлүүлж, 98 тонныг хуримтлуулж, ариутгаж, цаасан зурмаг болгож, “Поппи Пейпер Компани”-тай хамтран дахин боловсруулсан цаастай хольж, энэхүү шинэ бүтээгдэхүүнийг гарган авсан байна.

“Шибүши-Осаки ороомог” нэртэй 00-ийн цаасыг 12 ширхэгээр багцлан 2.70 доллараар худалдаалж эхэлжээ. Гэхдээ эхний ээлжинд зөвхөн Кагошима мужид худалдаалж байгаа бөгөөд цаагид улс орон даяар нэвтрүүлэх зорилготой байгаа аж. Кагошима муж нь цаасны үргүй ашиглалтыг бууруулж, бүх төрлийн хог, хаягдал дахин боловсруулахын төлөө тууштай ажиллаж, салбартаа тэргүүлэгч гэгдэх болжээ.

Энэхүү шинэ инновац нь байгаль орчин хамгаалах үйлсэд жинтэй хувь нэмэр оруулна гэж Шибүши, Осаки хотын захиргааны хамтарсан мэдэгдэлд дурджээ. Хэрэглэсэн живхийг ариун цэврийн цааснаас гадна барилгын материалд ашиглаж эхэлсэн талаар ч хэвлэлүүд мэдээлсэн байна.