Өнгөрсөн онд ОХУ-аас Хятадад нийлүүлэх нүүрсний биет хэмжээ буурчээ. Харин эсрэгээрээ Монгол, Австралийнх өссөн байна. Статистик мэдээллийг харвал Монголоос Хятадад нийлүүлсэн экспорт 19 хувь өссөн бол Австралийнх огцом буюу бараг 60 хувиар өсжээ. БНХАУ-ын Гаалийн хорооны мэдээллийг харвал хятадын нүүрсний импорт 543 сая тоннд хүрсэн байна. Австралийнх өссөн нь хоёр улсын хооронд дипломат харилцаа сайжирч, элдэв төрлийн худалдааны хоригоо цуцалсантай холбоотой. Түүнчлэн Оросын нүүрс хэтэрхий үнэтэй, АНУ-тай худалдааны маргаантай байгаа нь ч тодорхой хэмжээнд нөлөөлжээ.

Монголчууд бидний хувьд нийлүүлэх нүүрсний тоо, хэмжээ өссөн нь газарзүйн байрлал шууд нөлөөлсөн. Мөн түүнчлэн хоёр улсын хооронд гацаад байсан төмөр замын холболтыг ойрын хугацаанд шийдэх гэж байгаа нь ч бас нөлөөлтэй. Хамгийн гол нь гангийн үйлдвэрлэлд ашиглагддаг  өндөр зэрэглэлийн түлш Австрали, Монголоос нийлүүлэгддэг тул экспорт өсөх гол шалтгаан болжээ. Ганцхан баримт сөхөхөд өнгөрсөн онд урд хөршийн гангийн үйлдвэрлэлд ашиглагдах коксжих нүүрсний импортын 60 хувийг Монголчууд бид бүрдүүлжээ. Блумберг, FT зэрэг санхүүгээр дагнасан хэвлэлүүд Монгол Улс ойрын хугацаанд БНХАУ-тай төмөр замын холболт хийхээр эрмэлзэж байгааг онцолсон байна. Ингэснээр ОХУ-ын нийлүүлэх нүүрсний хэмжээ буурахын хэрээр Монгол Улсын нийлүүлэх нүүрсний хэмжээ ойрын гурван жилдээ өссөөр байна гэж дүгнэж байна.

Бид эндээ уран гэж талцаад, цус шүүх дээрээ тулаад байгаа болохоос нэг чухал хэлэлцээ хийсэн. Энэ нь “Эрдэнэс-Тавантолгой” ХК-иас Хятадын дөрвөн компанид 16 жилийн хугацаатай нүүрс нийлүүлэх баталгаа юм. Баталгаа ёсоор жилдээ 20 сая тонн нийлүүлэх дөрвөн жилийн баталгаа билээ. Ингэснээр манай нүүрсний нийлүүлэлт 20 саяас буухгүйгээр үл барам түүхэн дээд амжилтаа ч эвдэх бүрэн боломжтой юм.