Тоглоомын салбарын томчуудын нэг Нинтендо компани тоглогчдыг хэдэн жил хүлээлгэсэн шинэ консолио худалдаанд гаргана гэж өчигдөр зарлажээ.

Нинтендогийн Свитч системийн үргэлжлэл “Свитч 2”-ыг 2025 онд багтаан худалдаанд гаргах нь баттай болсон гэж компанийн төлөөлөгчид мэдэгдээд сурталчилгааны бичлэгээ цацсан байна. Уг бичлэгээс харахад Свитч 2 нь өмнөх загвартайгаа ерөнхийдөө төстэй боловч овор мэмжээний хувьд яльгүй том болжээ. Мөн системийн удирдлага буюу Жой-Кон өмнө нь дотогш чиглэлд байрлалтай байсан бол шинэ загвар дээрээ их биеийн хажуу талд байрлуулсан харагдана.

Свитч 2 дээр тусгайлан зориулсан тоглоомуудыг тоглохоос гадна Нинтено Свитч системийн биет болон дижитал тоглоомуудыг ч тоглох боломжтой. Гэхдээ Свитч 2 нь шинэ технологи шингээсэн тул Свитч системийн зарим хуучин тоглоомыг дэмжихгүй гэдгийг ч анхаарууллаа. Харамсалтай нь компанийн зүгээс үүнээс цаашх дэлгэрэнгүй мэдээлэл өгсөнгүй. Системийн дэлгэрэнгүй мэдээллийг дөрөвдүгээр сард болох Нинтендо Дайрект үйл ажиллагаан дээр танилцуулна гэх мэдээлэл бас байна. Түүнчлэн “Nintendo Switch 2 Experience” арга хэмжээг хэд хэдэн оронд зохион байгуулж, тоглогчид шинэ системийг туршиж үзэх боломжтой болно гэж Киото төвтэй Нинтендо компаниас мэдээллээ.