БНЭУ Монгол Улстай уул, уурхайн салбарт хамтран ажиллах гэрээ байгуулах урьдчилсан хэлэлцээ хийж буй талаар Энэтхэгийн Theprint.in цахим хуудас мэдээллээ.

Гэрээний зорилго Азийн хоёр орны хооронд ашигт малтмал тээвэрлэхэд анхаарна гэж Энэтхэгийн Засгийн газрын уул, уурхайн хөгжил хариуцсан газрын эх сурвалж, өнөөдөр/2024.11.28/ мэдээлжээ.

Уг гэрээнд Монгол Улс зэс, нүүрс зэрэг ашигт малтмалын тээвэрт анхааран ажиллана гэж нэрээ нууцалсан эх сурвалж мэдээлсэн гэнэ. Харин Энэтхэгийн Уул, уурхайн яамнаас энэ асуудалтай холбогдуулан тодруулах гэсэн ч тайлбар өгөөгүй байна.

JSW Steal, SAIL зэрэг дотоодын гангийн үйлдвэр далайд гарцгүй тус улсаас ган хайлуулахад чухал хэрэгцээт коксжих нүүрс импортлох яриа, хэлцэлд оролцож байгаа юм байна.

Үүнээс гадна, Энэтхэг улс Гималайн нурууны Жамму, Кашмир зэрэг бүсэд литийн орд илрүүлж, хоёр сарын дараа дуудлага худалдаагаар оруулах гэж буй талаар ч уг эх сурвалж задруулсан байна. Мөн Энэтхэгийн Засгийн газар ОХУ, Монгол, Чили, Замби гэх мэт хилийн чанадад чухал хэрэгцээт ашигт малтмал хайгуулын ажил явуулж байгаа гэжээ.

Энэтхэгийн Засгийн газар чухал хэрэгцээт ашигт малтмалын орд дуудлага худалдаагаар оруулах олон тооны арга хэмжээ зохион байгуулж байгаа нь цэвэр эрчим хүчний салбарыг хөгжүүлэхэд чиглэж байгаа бөгөөд тэдгээр ашигт малтмалыг олборлох, боловсруулахад санхүүгийн урамшуулал олгохоор төлөвлөөд байгаа юм.