Хөнгөн үйлдвэрийн салбар тэр дундаа ноос бэлтгэх, боловсруулах үйлдвэрийг нэмэгдүүлэх зорилгоор ноосны урамшууллыг нэмэгдүүлнэ гэдгийг Ерөнхийлөгчийн тамгийн газраас мэдээллээ. Тухайлбал энэ онд ноосны урамшуулалд 23 тэрбум төгрөг зарцуулах юм байна. Өнгөрсөн онд 20 гаруй мянган малчинд зургаа орчим тэрбум төгрөгийн ноосны урамшуулал олгож байжээ.
Салбарын үйлдвэрлэгчид урт хугацаатай, хүү багатай зээл олгож, татварын бодлогоор дэмжин, төрийн худалдан авалтыг нэмэгдүүлэх шаардлагатай гэж үздэг юм. Ташрамд дурдахад  38 аж ахуйн нэгжид 170 тэрбум төгрөгийг хөнгөлөлттэй зээл, 18 тэрбум төгрөгийг хүүгийн татаас хэлбэрээр олгосон байна.

Монгол Улс 30 орчим сая хоньтой, жилдээ 36 мянган тонн ноос ашигладаг гэх судалгаа бий. Монгол Улсын урт хугацааны хөгжлийн бодлого “Алсын хараа-2050” хөтөлбөрийн Зорилт 4.2.-т “Эдийн засгийн тэргүүлэх салбаруудыг хөгжүүлж, экспортын баримжаатай эдийн засгийг бий болгоно” гэж тодорхойлсон байдаг. Зорилтыг хэрэгжүүлэх эхний үе шатыг 2021-2030 он гэж томъёолоод үүний хоёрдугаарт, “Хөдөө аж ахуйн бүтээгдэхүүний боловсруулалтын түвшнийг нэмэгдүүлж, малын гаралтай бүтээгдэхүүний экспорт нэмэгдсэн байна” гэж дурджээ.

Монгол Улсын Ерөнхийлөгч У.Хүрэлсүх энэ сарын 22-ны өдөр ноос ноолууран бүтээгдэхүүний чиглэлээр үйл ажиллагаа явуулдаг зарим компанийн төлөөлөлтэй уулзаж, салбарын ирээдүйн талаар санал солилцсон юм.