Нийслэлээс эхний ээлжид гаргасан 500 тэрбум төгрөгийн “Улаанбаатар бонд”-ын анхдагч зах зээлийн арилжааны захилга дүүрч хаагдлаа. “Улаанбаатар бонд” нь 36 сар хүртэлх хугацаатай 12-14% хүүтэй бөгөөд 16 хөрөнгө оруулагч захиалга өгчээ. Тухайлбал нэг жилийн 12% хүүтэй, 100 тэрбум төгрөгийн үнийн дүнтэй нэг сая ширхэг өрийн хэрэгслийг худалдан авахаар дөрвөн хөрөнгө оруулагчийн таван захиалга, хоёр жилийн 13% хүүтэй, 100 тэрбум төгрөгийн үнийн дүнтэй нэг сая ширхэг өрийн хэрэгслийг худалдан авахаар таван хөрөнгө оруулагчийн таван захиалга, гурван жилийн 14% хүүтэй, 300 тэрбум төгрөгийн үнийн дүнтэй гурван сая ширхэг өрийн хэрэгслийг худалдан авахаар зургаан хөрөнгө оруулагчийн зургаан захиалга бүртгэгдсэн байна.

Нийслэл бонд гаргаж төвлөрсөн хөрөнгийн эх үүсвэрээр эрчим хүчний хуримтлуурын станцын ажилд 296 тэрбум төгрөг, гэр хорооллын дахин төлөвлөлтөд 52.5 тэрбум төгрөг, авто замын бүтээн байгуулалтад 120.6 тэрбум төгрөг зарцуулахаар төлөвлөөд байгаа юм. Харин Сэлбэ дэд төвийн орон сууцны иж бүрэн цогцолбор хороолол байгуулах ажлын төсвийг 1.6 их наяд төгрөгөөр нэмэгдүүлэхээр тусгажээ.