Эверестийн оргилд авирч байсан Британийн уулчин Даниел Патерсон, шерпагийн хамт сураггүй болжээ. Тэд өнгөрсөн мягмар гарагаас хойш тус оргилын 7924 метрийн өндөрт сураггүй болсон тул аврагч нар тэднийг аль хэдийнэ нас барсан гэж таамаглаж байна. Энэ хэмжээний өндөрт хүчил төрөгчийн түвшин маш бага байдаг тул тухайн уулчны хүчил шүлтийн харьцаа доголдож, өндрийн өвчин тусаад хэдхэн хормын дотор үхэлд хүргэдэг гэж мэргэжилтнүүд хэлж байгаа юм.

Даниел Патерсон орон нутгийн цагаар 5-р сарын 21-ний өглөөний 4.40 цагт хайрханд амжилттай гарсан гэж олон нийтийн сүлжээнд нийтэлж байжээ. Харин тэрээр шерпагийн хамт оргилоос буух үеэрээ сураггүй алга болсон байна. Сураггүй болсон Британийн уулчин өдгөө 39 настай, шерпа Пастенжи нь 23 настай байжээ. Мэргэжилтнүүд тэднийг мөсөн тавцан нурснаас үүдэн амиа алдсан байж болзошгүй гэж таамаглаж байгаа юм. Хайрханы цаг уурын нөхцөл байдлаас шалтгаалан цогцсыг буулгах нь маш хүнд байгаа тул эрэн хайх ажиллагааг зогсоож, тэднийг хайрханд нь үлдээнэ гэж Британийн хэвлэлүүд мэдээлж байна. Авиралтыг зохион байгуулсан “8K Expedition” компани баасан гарагт амиа алсан гэж цахим хуудастаа нийтэлсэн юм.

Эверестийн оргилд өнгөрсөн 14 хоногт авирсан 5 уулчин амиа алдсаны хоёр нь Монгол Улсын уулчин байсан билээ. Зөвхөн өнгөрсөн долоо хоногт л гэхэд Кени, Румын, Британийн тус бүр нэг уулчин амиа алдсан байна. Өнгөрсөн жил Эверестийн оргилд нийт 18 хүн амиа алджээ.