Хөдөлмөр, нийгмийн хамгааллын яамны дэргэдэх Хөдөлмөрийн аюулгүй байдал, эрүүл мэндийн төвийн дарга М.Даваабат болон түүний хамтран зүтгэгчдийн талаар авлига, албан тушаалын хэрэгт холбогдуулан хуулийн байгууллагууд шалгаж эхэлжээ. Тодруулбал, Эрүүгийн цагдаагийн газраас 2023 оны 02 дугаар сарын 16-ны өдөр ХАБЭМТ-д ажиллагаа явуулж, холбогдох хүмүүсээс мэдүүлэг авсан байна. Мөн тус төвийн нэр бүхий албан тушаалтны ажлын өрөө, гэрт нэгжлэг явуулж холбогдох материалуудыг хураан авчээ. Түүнчлэн аудитын байгууллагаас шалгалт орж түүвэрчилсэн байдлаар шалгахад олон зуун сая төгрөгийн асуудал ч гарсан тухай мэдээлэл ирж байгаа.

Манай сайт 56 жилийн түүхтэй тус байгууллагын дарга, албан тушаалтнууд нь албан тушаалын болон авлигын хэрэгт холбоотой байж болзошгүй үйлдлүүдийн талаар өмнө нь хэдэнтээ бичиж байсан билээ ( http://shugeluleegch.mn/r/60488 , http://shugeluleegch.mn/r/60818 ,  http://shugeluleegch.mn/r/6208 эдгээр линкээр орж өмнөх мэдээллүүдийг харах боломжтой).

Манай нийтлэлүүдийн мөрөөр тус байгууллагын асуудал хуулийн байгууллагуудын анхааралд орж, хяналт шалгалтын ажлууд эхэлсэн байна. Цөөнгүй жил тус төвийн дотоодод үүссэн нөхцөл байдлын тухай гомдол ХНХЯ-нд очсон ч авч хэлэлцэлгүй явж ирсэнийг зарим нөлөө бүхий улстөрчидтэй ч холбон хардах үндэслэл байдаг. Ямартаа ч тус байгууллагын дарга М.Даваабат болон хамтран зүтгэгч зарим хүн ийнхүү хуулийн байгууллагын хаалга татаж байна. М.Даваабат болон тус байгууллагын нэр бүхий албан тушаалтнууд нь төрийн өмчийн байгууллагын машиныг хувийн малчин айлдаа ашиглуулсан, байгууллагын багаж хэрэгслийг хувийн байгууллагад түрээслүүлж орлого олсон, тоног төхөөрөмж багаж худалдан авахдаа хамаарал бүхий компаниас авсан, дутуу хүлээж авсан, үндэслэлгүй хөрөнгөжсөн, ямар ажил гүйцэтгүүлсэн нь тодорхой бус байдлаар байгууллагуудтай гэрээ хийж мөнгө шилжүүлсэн гэх мэт асуудлууд байгаа юм.