Аж үйлдвэр, эрдэс баялгийн яамнаас шатахууны нийлүүлэлт, хангамж сайжирч нөөц бүрдүүлэхэд анхаарч байгааг мэдээлэв.

Тус яамнаас газрын тосны бүтээгдэхүүнтэй холбогдуулан ээлжит хэвлэлийн бага хурал хийх үеэр ирэх оны нэгдүгээр сарын захиалга баталгаажсан болохыг дурдсан юм.

Тодруулбал, нийт 145 мянган тонн АИ-92 автобензин, 150 мянган тонн дизель түлш худалдан авах захиалгаа баталгаажуулжээ. Мөн өнөөдрийн байдлаар нийт 164 вагон буюу 10 мянган тонн АИ-92 автобинзен төмөр зам дээр явж байна. Энэ нь манай улсын таван өдрийн хэрэглээ бөгөөд ОХУ-аас тогтмол нийлүүлэлт хийгдэж байгаа аж. Энэ талаар салбарын дэд сайд Б.Энхтүвшин “Өнөөдрийн байдлаар газрын тосны бүтээгдэхүүний нийлүүлэлт хангамж ямар ч саадгүй болсон. Зүүн гурван аймагт шатахууны ямар ч асуудалгүй болсон. Мөн баруун талаараа Булган, Эрээнцав, Боршоо боомтоор Баян-Өлгий, Увс, Ховд аймгийн бүх сумд АИ-92, АИ-95, дизелийн түлш хангалттай хүргэгдсэн. Мөн төвийн бүс, Хангайн бүс буюу Өвөрхангай, Архангайд автобензин хүргэгдсэн бөгөөд нийлүүлэлт хийгдэж байна” гэлээ.

Мөн үргэлжлүүлэн яриандаа дурдсанаар Ерөнхий сайд Г.Занданшатар, Аж үйлдвэр эрдэс баялгийн сайд Г.Дамдинням, дэд сайд Б.Энхтүвшин нар ОХУ болон БНХАУ-тай шатахууны нөхцөл байдлын талаар тогтмол мэдээлэл солилцож, нийлүүлэлт хангамжийг сайжруулахад анхаарч байгаа аж.

Манай улсын хувьд шатахууны хэрэглээгээ 100 хувь импортолдог бөгөөд ОХУ 95 хувийг нь бүрдүүлж байна. Мөн 5 хувийг нь БНХАУ-аас импортолж байгаа юм. Арванхоёрдугаар сард манай улс 83,600 тонн АИ-92 автобензин, 134,240 тонн дизель түлш, 1,560 тонн АИ-95 автобензин худалдан авахаар захиалж, баталгаажуулсан. Өнөөдрийн байдлаар 75835 мянган тонныг импортолжээ. Үлдсэн 8 мянган тонныг нийлүүлэх дутуу бөгөөд 5000 орчим тонн бүтээгдэхүүн замдаа явж байгаа аж. Харин дизель түлшний тухайд арванхоёрдугаар сарын захиалгаас 30 хувиар илүү импортолсон бөгөөд нөөц бүрдүүлж буй юм байна.