Хүнс, хөдөө аж ахуй, хөнгөн үйлдвэрийн яам, Монголын мал зүйч, үржүүлэгчдийн үндэсний холбоотой хамтран “Монголд бий болсон үүлдэр, омгийн малын өнөөгийн байдал ба баталгаажуулалт” сэдэвт хэлэлцүүлгийг зохион байгууллаа.

Хэлэлцүүлгээс Малын генетик нөөцийн тухай хууль болон түүнийг даган гарсан эрх зүйн актуудыг хэрэгжүүлэх, шинэчлэн боловсруулах, орон нутагт үржүүлж буй нутгийн шилмэл малд явуулсан үржил селекцийн ажлын ололтыг хянан магадлах асуудлыг судалгаа шинжилгээ, тооцоололд үндэслэх, шалгуур үзүүлэлтийг олон улсын жишигт нийцүүлэх, төрийн зарим чиг үүргийг төрийн бус байгууллагаар хэрэгжүүлэх хамтын ажиллагааг өргөжүүлэх, мал үржүүлэг технологийн ажил үйлчилгээний жишиг үнэ тарифыг шинэчлэн боловсруулах шийдвэр гаргуулах зэрэг зөвлөмж дүгнэлтийг гаргалаа.

Энэ удаагийн хэлэлцүүлэгт Монгол Улсын Ерөнхийлөгчийн тамгын газар, Хүнс, хөдөө аж ахуй, хөнгөн үйлдвэрийн яамны Мал аж ахуй, генетик нөөцийн бодлогын хэрэгжилтийг зохицуулах газар, Булган аймгийн Хүнс, хөдөө аж ахуйн газрын Мал аж ахуйн хэлтэс, Мал аж ахуйн эрдэм шинжилгээний хүрээлэн, Хөдөө аж ахуйн их сургууль, хувийн мал үржүүлэг технологийн ажил үйлчилгээний нэгж, эрчимжсэн үхрийн аж ахуй эрхлэгчдийн төлөөлөл, Олон улсын төслийн техникийн ажилтан, зөвлөх, гавьяат мал зүйчид, үүлдэр омгийн малын зохион бүтээгчид зэрэг нийт 34 төлөөлөгч оролцсон юм.