Аж үйлдвэрийн салбарын эрэлтээс шалтгаалан түүхий эдийн зах зээл дээр зэсийн ханш сүүлийн хоёр жилийн дээд үзүүлэлт буюу тонн тутамдаа 9.9 мянган ам.долларт хүрч өсжээ. Даваа гарагт зэсийн ханш 1.1 хувиар өссөн бол, арилжаа хаахад 9.86 мянган ам.доллар болж буурсан байна. Ингэж өсөх болсон шалтгаан нь геополитикийн эрсдэл, Израиль болон Украины хямрал, АНУ-ын Холбооны нөөцийн сангийн мөнгөний бодлогын тодорхойгүй байдал зэрэг нөлөөлжээ. Түүнчлэн БНХАУ-ын дотоодод аж үйлдвэрийн салбарын сэргэлт ажиглагдаж байгаа нь эрэлтийг нэмэгдүүлэх хүчин зүйл болсон байна.

Уул уурхайн салбарт зэсийн томоохон тоглогчид өөр төсөлд хөрөнгө оруулах, Африкийн хэд, хэдэн зэсийн төсөл хөрөнгө оруулалт татаж эхэлсэн нь ч мөн адил нөлөөлжээ. Гэвч эрэлт их байгаа ч нийлүүлэлт тодорхойгүй хэвээр байна. Ханган нийлүүлэх сүлжээ, дэд бүтцийн тодорхойгүй байдал байсаар байгаа нь зэсийн ханш өсөх шалтгаан болсныг шинжээчид дурджээ.