Монгол Улсын Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн Бүгд Найрамдах Узбекистан Улс (БНУзбУ)-ын Хөрөнгө оруулалт, аж үйлдвэр, худалдааны орлогч сайд Илзат Касимов тэргүүтэй төлөөлөгчдийг 2025.08.13-ны өдөр хүлээн авч уулзлаа.

Уулзалтын эхэнд БНУзбУ-ын Хөрөнгө оруулалт, аж үйлдвэр, худалдааны орлогч сайд Илзат Касимов өнгөрсөн нэг жилийн хугацаанд хоёр улсын Ерөнхийлөгч нарын харилцан айлчлалын үр дүнд хийж хэрэгжүүлэхээр тохиролцсон ажлууд богино хугацаанд бодитоор хэрэгжиж буйг тодотголоо. Тухайлбал, БНУзбУ, Монгол Улсаас 100 мянган толгой амьд хонь, ямаа худалдан авахаар тохиролцсон бөгөөд эхний ээлжийн 15 мянга толгой хонийг тээвэрлэхэд бэлэн болсон гэдгийг мэдэгдэв. ХХААХҮ-ийн сайд Ж.Энхбаяр энэ ажлыг эрчимжүүлэхэд дэмжлэг үзүүлж,  өмнө нь хэлэлцсэний дагуу Монголын талаас экспортын хураамжийн хөнгөлөлт үзүүлэхээр шийдвэрлэсэнд талархал илэрхийлсэн юм.

Түүнчлэн Монгол Улсаас Узбекистан руу экспортолсон малын мах тус улсын хэрэглэгчдийн дунд эрэлттэй байгаа. Цаашид Монголд боловсруулсан малын махыг шууд тус улсын сүлжээ дэлгүүрүүдэд борлуулах боломжтой гэдгийг уламжлав. Хоёр тал хамтран махны худалдааны сүлжээ бий болгоход хувийн хэвшлүүд голлох үүрэгтэй оролцох бөгөөд Монголын талын мах, махан бүтээгдэхүүн үйлдвэрлэгчдийг БНУзбУ-д ажиллахыг урьсан юм.  Ноос, ноолуурын салбарт ч энэ жишгээр хамтын ажиллагааны өргөн боломж байгааг тэрбээр дуулгалаа.

Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн хоёр улсын төрийн өндөр дээд түвшинд тохиролцсон ажлууд бодит ажил хэрэг болоход БНУзбУ-ын талаас хүчин чармайлт гаргаж буйд талархал илэрхийллээ. Цаашид хамтран хэрэгжүүлэх мах, ноос, ноолуур боловсруулах зэрэг хөдөө аж ахуйн төсөл хөтөлбөр, хоёр орны худалдааг өргөжүүлэх арга хэмжээний төлөвлөгөөг нарийвчлан гаргаж, улам нягт хамтран ажиллана гэдгээ уламжиллаа.