Нийгэм

Шатахууны нөөцийг тогтвортой байлгахад анхаарна

19 цаг 26 минут
Аж үйлдвэр, эрдэс баялгийн сайд Г.Дамдинням шатахуун импортлогч аж ахуй нэгжүүдийн төлөөлөлтэй уулзлаа.
 
Уулзалтаар, шатахууны тогтвортой нийлүүлэлтийг хангах, ойрын болон дунд хугацаанд хэрэгжүүлэх бодлогын арга хэмжээ, ОХУ-ын дотоод нөхцөл байдал тодорхойгүй байгаатай холбоотойгоор шатахууны хангамжид эрсдэл үүсэхээс сэргийлж, 30 хоногийн нөөцийг тогтмол барих шаардлагатай талаар санал солилцлоо.
 
Мөн ОХУ-ын Роснефть компанийн Ангарскийн үйлдвэр 2025 оны наймдугаар сарын 10-наас есдүгээр сарын 10-ны хооронд урсгал засварт орохоор төлөвлөгдсөнтэй холбогдуулан шатахууны захиалга, төлөвлөлтийг уялдуулан зохион байгуулах шаардлагатайг талууд ярилцлаа.
 
Түүнчлэн Засгийн газрын 2025 оны зургаадугаар сарын 25-ны өдрийн хуралдаанаар шатахууны хангамж, нийлүүлэлтийн нөхцөл байдлыг танилцуулж, нөөцийг нэмэгдүүлэх чиглэлээр Аж үйлдвэр, эрдэс баялгийн сайд болон Сангийн сайдад үүрэг чиглэл өгсөн бөгөөд холбогдох шийдвэрүүдийг ойрын хугацаанд танилцуулах юм.
 
Дашрамд дурдахад, Монгол Улсын шатахууны хэрэглээ жил бүр нэмэгдэж байгаа бөгөөд 2025 оны эхний хагас жилд 1.36 сая тонн шатахуун импортолжээ.
 
Импортын үйл ажиллагаа явуулж буй 65 аж ахуйн нэгжийн 14 нь зах зээлийн 84 хувийг бүрдүүлж байгаа бол нийт импортын 70 хувийг ОХУ-ын “Роснефть” компани хангаж байна.
 
2025 оны долоодугаар сарын 18-ны байдлаар улсын хэмжээнд А-80 бензин 3 хоног, Аи-92 23 хоног, Аи-95 42 хоног, Дизель түлш 20 хоног, ТС-1 түлш 53 хоногийн нөөцтэй байна гэж Аж үйлдвэр, эрдэс баялгийн яамнаас мэдээллээ.  

Холбоотой мэдээ

Монгол-Киргизийн боловсрол, соёлын төв байгуулна
Өнөөдөр цахилгаан шугамд хийгдэх засварын хуваарь
Ерөнхийлөгч У.Хүрэлсүх, С.Жапаров нар “Иж бүрэн түншлэл”-ийн харилцаа тогтоосноо зарлалаа

Сэтгэгдэл бичих

Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд SHUGELULEEGCH.mn хариуцлага хүлээхгүй.
Сэтгэгдэл 0