Израиль болон Ираны хоорондын харилцаа зөрчилдөөнтэй байгаа энэ цаг үетэй зэрэгцэн дэлхийн зах зээл дээр алт, газрын тосны үнэ нэмэгджээ. Тухайлбал унц алтны үнэ 2400 ам.доллароос давлаа. Иран,Сири, Иракт дэлбэрэлт болсон тухай хэвлэл мэдээллийн хэрэгслээр шуугьж байхад металын бирж дээр унц алт 1.3% өсөж тав дахь долоо хоногтоо дараалан өслөө. Хэдийгээр өнгөрсөн долоо хоногийн сүүлээр саарах төлөвтэй байсан ч ийнхүү дахин өсөж эхэлсэн нь энэ юм. Ойрх Дорнодын хямрал бүс нутгийг хамарсан хямрал үүсэхээс сэргийлж улмаар алтны эрэлт нэмэгджээ.

Түүхий эдийн голлох нэр төрлийн нэг газрын тосны үнэд ч Ойрх Дорнодын нөхцөл байдал нөлөөлж эхэллээ. Брент маркийн газрын тосны үнэ баррель тутамдаа 90 ам.доллароос давж огцом өссөн байна. Түүнчлэн ОПЕК+ улс орнууд олборлолтын хэмжээг бууруулсан нь нийлүүлэлт саарахад нөлөөлж улмаар түүхий газрын тосны үнэ өнөөг хүртэл өндөр хэвээр байна. Цаашлаад эрчим хүчний үнэ ч дэлхий даяар нэмэгдэх эрсдэл бий тул эдийн засгийн богино хугацааны хямрал үүсэж магадгүй гэдгийг мэргэжилтнүүд анхааруулсаар байгаа билээ.