Нийслэл хотод үерийн хамгийн өндөр эрсдэл бүхий 24 байршлаас 10 байршлийг сонгож үерийн далан барих, сэргээн засварлах ажил хийхээр болсон байна. Одоогоор Дэлхийн банктай үерийн далан байгуулахад хөрөнгө оруулахаар тохирч, ТЭЗҮ-ийг боловсруулж эхэлжээ. Хэдийгээр санхүүжилтийн хэмжээ эцэслэн батлагдаагүй ч урьдчилсан тооцооллоор 380 тэрбум төгрөг олгохоор байгаа юм.

Геодези, усны барилга байгууламжийн газрын тооцоолсноор улсын хэмжээнд үерийн далан байгуулах, насжилт хэтэрсэн даланг шинэчлэх ажилд нийт таван их наяд төгрөгийн хөрөнгө оруулалт шаардлагатай аж. Улаанбаатар хотод одоо байгаа үерийн далангийн урт 170 км. Үүнээс 70% нь насжилт хэтэрч, ашиглалтын шаардлага хангахааргүй болжээ. Цаашид нийслэл хотыг болзошгүй үер, усны гамшгаас сэргийлэхийн тулд 450 км үерийн далан шинээр байгуулах шаардлагатайг мэргэжилтнүүд анхааруулсаар байна.

Сүүлийн жилүүдэд уур амьсгалын өөрчлөлтийн улмаас үер усны аюулын давтамж нэмэгдсэнийг статистик үзүүлэлт харуулж байна. Үүний нэг жишээ нь 2023 онд нийслэлд буусан үер. Энэ гамшгаас шалтгаалж нийт 48 тэрбум төгрөгийн эдийн засгийн хохирол учирч, дөрвөн иргэн амь насаа алдсан билээ. Цаашид ч үерийн аюул их байхыг мэргэжилтнүүд онцолж байна. Цаг уур, орчны шинжилгээний газрын мэдээллийг харвал энэ зургаадугаар сар олон жилийн дунджаас ахиу хур тунадастай байх аж.