Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны тойргийн шүүх өчигдөр хаалттай хуралдаж “Монголын бурхан шашинтны шинэ төв” хийдийн хамба лам З.Санждоржид 9.6 жилийн хорих ял оноожээ. Түүнтэй хамт Д.Бямбажав гэгчийг шүүсэн бөгөөд есөн жилийн хорих ял оноосон байна.

Уг хоёр хүнийг 2024 оны дөрөвдүгээр сарын эхээр ТЕГ-ын Мөрдөн шалгах газрынхан саатуулан шалгаж эхэлсэн юм. Улмаар НПГ-аас Эрүүгийн хуулийн 19.4-1-ийн гадаадын тагнуулын байгууллага, иргэнтэй хууль бусаар хамтран ажилласан хэмээн яллах дүгнэлт үйлдэн дээрх шүүхэд шилжүүлснээс хойш багагүй хугацаа өнгөрсний дараа ийнхүү шийдвэрлэж байна.

Шүүхээс эл хоёр иргэнийг гадаадын тагнуулын байгууллагатай хамтран ажилласан гэм буруутайд тооцож, З.Санждорж ламд есөн жил зургаан сар, Д.Бямбажавт есөн жилийн ял шийтгэж, нээлттэй хорих байгууллагад эдлүүлэхээр боллоо.