Төв аймгийн Жаргалант сумын Өгөөмөр багт энэ сарын 21-ний өдөр гарсан галын улмаас байшин шатаж бага насны гурван хүүхэд харамсалтайгаар амь насаа алджээ.

 Жаргалант сумын Өгөөмөр баг нь Төв аймгийн төвөөс баруун хойд зүгт 170 км, Сэлэнгэ аймгийн Баянгол сумаас 56 км-т оршдог учир Сэлэнгэ аймгийн Онцгой байдлын газрын Баянгол сум дахь 40 дүгээр ангийн алба хаагч нар ослын газар очсон байна. Галын аюулын улмаас иргэн Б-гийн 7х8 метрийн хэмжээтэй байшин шатаж байсныг унтраажээ.

Галын улмаас таван настай эмэгтэй Э, дөрвөн настай эмэгтэй Б, хоёр настай эмэгтэй Г нар өртөж амиа алдсан байна. Орон нутгийн болон бусад хэвлэл мэдээллийн хэрэгслээр нийтийг хамарсан цэвэрлэгээнд дайчлагдан, цэцэрлэг нь хагас хичээллэсэн үед гэрээ харж үлдсэн гурван охин амиа алдсан болохыг мэдээлсээр байна. Одоогоор ослын шалтгаан нөхцөл тодорхой болоогүй байна.