Уртаараа Европт гуравдугаарт ордог Урал мөрөнд хуримтлагдсан их хэмжээний мөс хайлж, ай саваа халин үерлэж, ОХУ-ын баруун Сибирь орчмын бүс, Казахстаны умард нутаг орчмын хот, суурин газрууд их хэмжээний үерт автаж, маш аюултай байдал үүсээд байна. Албаны эх сурвалжийн мэдээлснээр үерийн гамшгийн бүсэд өртсөн 110,000 гаруй иргэнийг албадан нүүлгэн шилжүүлсэн аж. Казахстан улсын 97,000 гаруй, ОХУ-ын 12,000 иргэнийг аюулгүй газар руу нүүлгэн шилжүүлжээ. Өнөөдрийн байдлаар Оренбургийн бүс үерийн гамшигт хамгийн ихээр өртсөн гэв.

Энэ сарын 05-наас хойш нүүрлэсэн үерийн гамшгийн улмаас хоёр улсын Засгийн газраас онц байдал зарлаж, авран хамгаалах болон хүчний байгууллагууд өндөржүүлсэн бэлэн байдалд ажиллаж, гол мөрний усны түвшинг тасралтгүй ажиглаж байгаа юм байна. Мөн үерт автсан нутгуудад албаныхан нисдэг тэргээр агаараас ажиглахын зэрэгцээ Үнэн алдартны шашны лам нарыг авч яван ном уншуулж, гамшгаас аврахыг бурхан тэнгэртээ даатгаж байгаа гэж ИТАР-ТАСС агентлаг мэдээлжээ.