Сүхбаатар дүүргийн Засаг даргын Тамгын газраас 1-20 дугаар хорооны иргэдийн төлөөлөлд 2025 оны төсвийн төслийн танилцуулгыг хийлээ. Уг хэлэлцүүлгийг нээж дүүргийн ЗДТГ-ын дарга Ө.Энхбаяр “Иргэд та бүхэн олон нийтийн мэдээллийн хэрэгслээр МУ-ын төсөв хэлэлцэгдэж байгаа мэдээллийг авч байгаа. Үүний нэгэн адил дүүргийн Засаг даргын 2025-2028 онд хэрэгжүүлэх үйл ажиллагааны хөтөлбөр, 2025 оны төсвийн төсөөллийн саналуудаа нэгтгэж байна. Холбогдох хууль тогтоомжийн дагуу иргэд, хорооноос ирүүлсэн саналыг нэгтгэн дүүргийн ИТХ-д өргөн барьж, хэлэлцүүлээд 2025 онд иргэн таны ажиллаж, амьдарч байгаа хороо, орчинд ямар бүтээн байгуулалт, хөрөнгө оруулалтын ажил хийхийг шийдвэрлэнэ. Тийм учраас энэ хэлэлцүүлэг нь иргэн таны болон хорооны тань амьдарч орчныг сайжруулахад чиглэсэн ямар төсөл, арга хэмжээг хэрэгжүүлэхээр төлөвлөж вэ гэдгийг мэдэж авах ач холбогдолтой” гэдгийг онцлов.

Сүхбаатар дүүрэг нь нийслэлийн төсвийн 32 орчим хувийг дангаараа бүрдүүлдэг бөгөөд энэ онд нийслэлийн төсөвт 405 тэрбум төгрөг төвлөрүүлэх үүрэг хүлээсэн. Өнөөдрийн байдлаар төвлөрүүлэх орлого 328.2 тэрбум буюу гүйцэтгэл 81,8 хувьтай байна.