Өмнөд Солонгост дэгдээд буй ой хээрийн түймэр нь хүний буруутай үйл ажиллагаа, тэр дундаа гагнуурын очноос үүдсэн байж болзошгүй гэж эрх баригчид үзэж байна. Одоогоор ажлын хэсгийн түймрийн шалтгааныг тогтоохоор ажиллаж байгаа юм.

Өмнөд Солонгосын өмнөд бүс нутгаар дэгдсэн ой хээрийн түймрийн улмаас наад зах нь 26 хүн амиа алдаж, 200 гаруй барилга байгууламж сүйдэн, 27 мянган хүнийг түймрийн голомтын бүсээс нүүлгэн шилжүүлээд байна. Эдгээрийн дотор дэлхийн түүхийн өв болсон 1300 жилийн настай Буддын шашны сүм сүйдээд байгаа билээ.

Ерөнхийлөгчийн үүргийг түр орлон гүйцэтгэгч Хан Док Су хэлсэн үгэндээ “Манай улсын түүхэнд тохиосон их түймрээс ч илүү хор хохирол учруулах магадлалтай байна. Шаардлагатай бүх нөөц бололцоогоо дайчлан түймрийг газар авахуулахгүй” гэдгийг онцолжээ. Гэсэн ч түймрийг унтраахад ширүүн салхи саад болж байгааг газар дээр нь ажиллаж буй аврагчид мэдэгдэж байна. Одоогоор түймрийн голомтод гал унтраах, аврах ангийн ажилчид, дотоодын цэргийн нийт 4650 алба хаагч дайчлагджээ. Өмнөд Солонгосын зүүн өмнөд хэсгийн Андун, Уйсон, Санчон, Улсан хотууд түймэрт хамгийн их өртөөд байна. Цаг уурчдын мэдээлснээр пүрэв гарагт 5-10 мм-ийн түр зуурын бороо орох төлөвтэй бөгөөд түймэр бага ч гэсэн намжиж магадгүй байгаа юм.