АНУ-ын Ерөнхийлөгч Дональд Трамп маргааш ОХУ-ын Ерөнхийлөгчтэй гал зогсоох түр хэлэлцээний асуудлыг хэлэлцэнэ гэж "Ройтерс” агентлаг мэдээллээ. Тэрбээр хэлэхдээ “Би мягмар гарагт Ерөнхийлөгч Путинтэй хэлэлцэнэ. Амралтын өдөр завгүй өнгөрлөө” гэжээ. Одоогоор утсаар холбогдох,биечлэн уулзах эсэх нь тодорхой болоогүй байна. Гэхдээ ОХУ-ын Ерөнхийлөгчийн Гадаад бодлогын зөвлөх Юрий Ушаков "Шаардлагатай тохиолдолд хоёр улсын төрийн тэргүүн нарын уулзалтыг зохион байгуулахаар Кремль бэлдэж байна" гэж "ТАСС" агентлагт энэ сарын 16-ны өдөр мэдэгдэж байсан юм. 

Украины санаачилгаар АНУ-ын зүгээс дайны бүсэд 30 хоногийн хугацаатай гал зогсоох хэлэлцээ байгуулахаар төлөвлөж байгаа юм. ОХУ-ын зүгээс гал зогсоож болох ч хэд, хэдэн нөхцөлтэй байх ёстой гэж үзэж байгаа бөгөөд энэ нь Украины дургүйцлийг төрүүлээд байгаа билээ. Харин АНУ-ын тухайд гал зогсоох хэлэлцээг дэмжих бодлого ОХУ-д байгаа гэдэгт найдаж буйгаа илэрхийлээд байна. Өнгөрсөн долоо хоногт АНУ-ын засаг захиргааны төлөөлөл ОХУ-д айлчилж энэ тухай хэлэлцсэн ч тодорхой үр дүнд хүрч чадаагүй билээ.