Гүржийн нийслэл Тбилиси хотын шүүхийн ээлжит хуралдаанаар тус улсын Ерөнхийлөгч асан Михаиль Саакашвилид гурван жилийн ял нэмж оноожээ. Шүүх бүрэлдэхүүн түүнийг 2009-2012 оны хооронд хоёр дахь бүрэн эрхээ эдэлж байхдаа 9 сая еврогийн төсвийн хөрөнгийг зориулалтын бусаар ашигласан гэж үзэн ялыг нэмж оноожээ.

Михаиль Саакашвили 2021 онд Гүржийн шүүхээс зургаан жилийн хорих ял сонссон юм. Түүнийг эрх мэдлээ урвуулан ашигласан гэж үзэн ялласан байдаг. Гэхдээ тэрээр 2015 оноос Украины иргэншилтэй болж Одесс хотын захирагчаар хүртэл ажиллаж байлаа. Улмаар улстөрчид болон олон нийтийн шахалтаар 2021 онд Гүржид ирсэн юм. Ирмэгц нь түүнийг яллах дүгнэлт үйлдэн шүүх ажиллагаа эхэлсэн билээ.

Гүржийн шүүхээс түүнд нэмж ял оноосноор нийт есөн жилийн хорих ял эдлэхээр болж байна. Ингэснээр Саакашвили 2030 он хүртэл суллагдах боломжгүй болж байна. Ялыг сунгах шүүх хуралд Саакашвили эрүүл мэндийн шалтгаанаар оролцоогүй ажээ.