Умард Солонгосын засаг захиргаа Өмнөд Солонгос руу завиар оргохыг завдсан гурван хүнийг цаазаар авчээ. Америк болон барууны хэвлэлийн мэдээлж байгаачлан тус гурван хүнийг нэг зэрэг 90 ширхэг автомат буугаар буудан хороосон байна. Тухайн гурван хүний харьяалагддаг тосгонд цогцсыг нь аваачин иргэдийн нүдэн дээр шатаажээ. Гэрчүүдийн хэлж байгаагаар тэднийг гадсанд хүлж, удаа дараа буудсаны дараа зэрэмдэглэн, шатаасан байна. Цаазаар авахуулсан гурван хүн 28-30 насных бөгөөд өнгөрсөн нэгдүгээр сард Өмнөд рүү завиар оргох гэж байгаад үйлдэл дээрээ баригдсан байна.

Өнгөрсөн арван жилд оргохыг завдвал дор хаяж 15-20 жил засан хүмүүжүүлэх хөдөлмөрийн лагерьт хорих шийтгэл оноодог байжээ. Харин Солонгосын хойгийн нөхцөл байдал хурцадсан энэ цаг үед тэдэнд шууд цаазын ял оноох болжээ.