Саудын Арабын Жидда хотноо Украины Ерөнхийлөгч Владимир Зеленьский, АНУ-ын Төрийн нарийн бичгийн дарга Марко Рубио нар уулзах үеэр түр гал зогсоох тухай саналыг хэлэлцлээ. АНУ-ын дэвшүүлсэн энэ саналыг Украины зүгээс “эерэг санал” гэж хүлээн зөвшөөрсөн бөгөөд ОХУ-ыг ятгах нь АНУ-ын талын хүлээх үүрэг гэдгийг тодотгожээ.

Хэдийгээр өнгөрсөн долоо хоногт АНУ болон Украины төрийн тэргүүн нар Цагаан ордонд илтэд сөргөөцөлдсөн ч АНУ-ын зүгээс Украинд үзүүлэх тусламжаа зогсоохгүй гэдгээ илэрхийлжээ. АНУ-ын Төрийн нарийн бичгийн дарга Марко Рубио хэлэхдээ “ОХУ энэ саналыг хүлээн авна гэдэгт найдаж байна” гэсэн байна.

ОХУ-ын тал энэ саналыг хүлээн авах эсэх нь тодорхойгүй байна. Гэсэн ч ОХУ-ын зүгээс АНУ-ын тал бодитой санал дэвшүүлбэл хүлээн авахад бэлэн гэдгээ нэг бус удаа илэрхийлж байсан юм. ОХУ-ын төрийн мэдлийн “ТАСС” агентлаг түр гал зогсоох саналын тухай зөвхөн мэдээлээд өнгөрчээ.