Дэлхийн санхүүгийн томоохон хэвлэлүүдийн нэг “Financial Times” болон өөр хэд, хэдэн мэдээллийн хэрэгслээр АНУ болон Украин улсууд ашигт малтмалын гэрээ байгуулах тохиролцоонд хүрсэн тухай мэдээллээ. Цагаан ордон ч үүнийг баталсан байна. Одоогоор хоёр ч чухал ашигт малтмалын гэрээ байгуулахаар болжээ. Орон нутгийн цагаар лхагва гарагт Украины Ерөнхийлөгч Владимир Зеленьский гэрээнүүдэд гарын үсэг зурах товтой бөгөөд энэ баасан гарагт Вашингтонд айлчлахаар төлөвлөж байна.

Украин улсад 10 их наяд ам.долларын ашигт малтмалын нөөц буй гэж дүгнэдэг. Тэр дундаа батлан хамгаалах болон боловсронгуй технологийн түүхий эдүүд аривин бий гэж барууныхан үздэг юм. Европын холбооны тодорхойлсноор чухал ач холбогдолтойд тооцсон 34 ашигт малтмалын 22 нь Украинд бий гэж үздэг. Гэвч эдгээр ордуудыг Орос болон бусад улсуудын шахалтаар эдийн засгийн эргэлтэд оруулахгүй байсаар өнөөг хүрсэн юм.

Ашигт малтмалын гэрээнд гарын үсэг зурсан тохиолдолд АНУ-ын эдийн засгийн болоод бусад дэмжлэг хэвийн үргэлжлээд зогсохгүй Орос-Украины цэргийн ажиллагааг энхийн замаар шийдвэрлэхэд нөлөө үзүүлэхүйц алхам гэж шинжээчид үзэж байна.

Эх сурвалж: Mining