Өнгөрсөн 2024 оны зургаадугаар сард дотоодын зах зээлт нээлттэй хэлбэрээр гаргасан 500 тэрбум төгрөгийн “Улаанбаатар” бондын 89.1 хувь буюу 445.7 тэрбум төгрөгийг төлөвлөгөөний дагуу зарцуулжээ. Үүнийг Монголын хөрөнгийн биржийн тайланд дурдсан байна.

Улаанбаатар бондыг анх төлөвлөж байснаар Бөөрөлжүүтийн цахилгаан станц, авто зам, замын байгууламжийн засвар, шинэчлэл, ариутгах бохир усны “Туул-1” коллектор болон үерийн байгууламжийн бүтээн байгуулалтад зарцуулжээ.

Бондоор татан төвлөрүүлсэн хөрөнгийн 60% буюу 300 тэрбум төгрөгийг Бөөрөлжүүтийн цахилгаан станцын хөрөнгө оруулалтад зарцуулсан байна. Эрчим хүчний эх үүсвэрийг нэмэгдүүлэх бодлогын хүрээнд Төв аймгийн Баянжаргалан сумын нутагт орших Бөөрөлжүүтийн цахилгаан станцын эхний ээлжийн 150 мВт-ын барилган ажил дууссан юм.

Авто замын нэвтрүүлэх чадварыг сайжруулахын тулд гол болон туслах, орон сууцны хороолол дундах нийт 27 байршилд, 73.1 км урттай зам, ус зайлуулах хоолойн иж бүрэн бүтээн байгуулалтыг 150 тэрбумаар хийхээр төлөвлөснөөс 141.7 тэрбум төгрөгийг нь 2024 онд зарцуулжээ.