“Икс фактор”, “Америкийн шүтээн”, “Авьяаслаг британичууд” зэрэг дэлхий даяар хит болсон олон нэвтрүүлгээрээ алдартай продюсер, басхүү хатуухан шүүгч гэдгээрээ алдартай Саймон Кауэлл энэ жилийн “Авьяаслаг британичууд” шоуны зураг авах үеэр амиа алдах дөхжээ. Нэгэн оролцогч нүдээ боож, махир модон цохиураар тарвас хагалах үзүүлбэрийн үеэр эл хэрэг болсон байна. Оролцогч модон цохиураа тарвас руу шидсэн боловч цааш үсэрч С.Кауэллийн толгойн хажууд тусчээ. Азаар зураг авалтын багийнхан болон зэрэгцэж суусан шүүгч нарын авхаалж самбаагаар үхлийн аюулаас аврагдсан гэнэ.

Өдгөө 65 настай Саймон энэ явдалд нэг их айж, сандраагүй бөгөөд маш тайван сууж, оролцогчийг үзүүлбэрээ үргэлжлүүлэхийг тушаагаад инээмсэглэн суусаар байжээ. Учир нь, энэ бол түүний 12 дахь удаагаа амь нас нь аюулд орсон тохиолдол юм. Өмнө нь, авьяастан шалгаруулах зураг авалтын үеэр алдаа мадаг гарах нь хэдэнтээ тохиолдож, тэр бүрд “азтай” Саймон Кауэлл айсуй заналхийллээс аятайхан мултарч дөнгөсөөр өнөөг хүрчээ.