Гар утасны зах зээлээр дэлхийд тэргүүлэгч БНХАУ-д хиймэл оюуны үйлчилгээгээ нэвтрүүлэхээр зорьж буй Эппл корпораци тус улс дахь хамтрагчаараа Алибабаг сонгосон байна.

“Эппл сонголтондоо маш ихээр хаширлаж, Хятадын хэд хэдэн компанитай хамтран ажиллахаар ярилцсаны эцэст манайхыг сонголоо. Тэд манай хиймэл оюуныг бүтээгдэхүүндээ ашиглахаар шийдлээ” гэж Алибабагийн тэргүүн Жо Цай өнгөрсөн пүрэв гарагт Дубайд болж буй Дэлхийн засаглалын чуулган дээр тавьсан илтгэлдээ онцлон мэдэгджээ. Гэхдээ тэрбээр үйлчилгээ хэзээнээс нэвтэрч эхлэх болон Алибабагийн гүйцэтгэх үүрэг зэргийн талаар дэлгэрэнгүй мэдээлсэнгүй.

Мөн энэ хамтралын талаарх мэдээллийг хамгийн түрүүнд хүргэсэн The Information-ийнхны дамжуулснаар Эппл корпораци Алибабаг сонгохын өмнө DeepSeek, Baidu, ByteDance, Tencent зэрэг Хятадын томоохон пүүсүүдтэй удаа дараа уулзсан аж. Бүс нутгийн хэмжээнд тулгамдсан зарим нэг бэрхшээлтэй холбоотой гомдол санал болон хууль, эрх зүйн хүндрэлийн улмаас Эппл корпорацийн хиймэл оюун Эппл Интеллиженсийг АНУ, Канад, Их Британи, Австрали зэрэг зөвхөн хязгаарлагдмал зах зээлд л гаргаад байсан билээ. БНХАУ-ын Засгийн газар хиймэл оюуны үйлчилгээ үзүүлэгчдийг заавал дотоодын компанитай хамтрах, хууль ёсны зөвшөөрөл авахыг шаарддаг журамтай учир Эппл Интеллиженс хиймэл оюун тэрбум гаруй хүнтэй зах зээлд нэвтрэх хугацаа алдсан юм.

Эппл компани Хятадын дотоодын үйлдвэрлэгч Хуавэй, Вивогийн хүч түрэлтэнд шахагдаж, тус зах зээл дэх байр сууриа алдаж байсан бол одоо хиймэл оюуны үйлчилгээгээ нэвтрүүлснээр алдсан орон зайгаа нөхнө гэж зэх зээлийн судалгаа явуулдаг Каналис компанийн шинжээч Лукас Жон ярьжээ.