Он гарснаас хойш манай экспортын дийлэнхийг бүрдүүлдэг, гадаад валютын албан нөөцийн гол эх үүсвэр болсон нүүрсний салбар базаахгүй мэдээ дуулгалаа. Оны эхний сард Монгол Улс 5.2 сая тонн чулуун нүүрсийг 449 сая ам.доллароор заржээ. Энэ нь нэг утгаараа биет хэмжээ нь нэг сая тонноор нэмэгдсэн ч, үнийн дүнгээр 44 хувиар буурсан үзүүлэлт юм. Зөвхөн өнгөрсөн жилийнхээс үнэ нь буураад зогсохгүй сүүлийн гурван жилийн хамгийн бага үзүүлэлтээ үзүүллээ. Монгол Улс 2023 оны нэгдүгээр сард 565.3 сая ам.доллар, 2024 оны нэгдүгээр сард 803.1 сая ам.долларыг чулуун нүүрсний экспортоос олж байсан түүхтэй.

Энэн БНХАУ-ын хил дээрх агуулахууд дүүрч, татан авалт удааширсантай холбоотой байна. Үүнээс шалтгаалан экспортын биет хэмжээ нэмэгдсэн ч үнэн буурч байгаа тухай “Эрдэнэс Монгол” нэгдлээс мэдээлж байсан билээ.

Монгол Улс энэ онд нүүрсний экспортыг 83 сая тоннд хүргэх зорилт тавиад байгаа. Өнгөрөгч 2024 оны эхэнд 75 сая орчим тонн нүүрс экспортлох зорилт тавиад оны эцэс гэхэд 78.1 сая тонн болж давж биелэсэн юм.  

Гэсэн ч АНУ-ын Ерөнхийлөгчөөр сонгогдсон Доналд Трамп Хятадад тариф ногдуулсан БНХАУ-ын дургүйг хүргэж тэд зөрүүлээд АНУ-д 15 импортын тарив ногдуулаад байна. Чухамдаа энэ нь Монгол, Орос зэрэг бусад нийлүүлэгчдийн нүүрсний эрэлтийг өсгөх юм. Хэдийгээр богино хугацаандаа сөрөг нөлөөтэй ч урт хугацаандаа Монголын нүүрсний экспорт нэмэгдэх сайн талтай гэдгийг дэлхийн санхүүгийн шинжээчид онцлон мэдээлж байна.