Хөшигийн хөндийн нисэх онгоцны буудлаас Улаанбаатар хот чиглэлийн тууш замын дөрөв дэх км-т зургаан тээврийн хэрэгсэл мөргөлджээ. Өчигдөр 12:25 цагийн орчимд уг осол гарсан бөгөөд шалтгаан нь цасаар шуурч үзэгдэх орчин хязгаарлагдсантай холбоотой юм байна.

Улмаар ослын нөхцөл, хэргийн газрын үзлэг хийх зорилгоор өчигдөр 14:15 цагаас 16:20 цагийн хооронд замын зорчих хэсгийн хөдөлгөөнийг түр хязгаарлажээ. Тухайн замдээр хунгарлаж тогтсон цасыг түрэх, цэвэрлэх ажлыг Чингэлтэй дүүргийн ТҮК гүйцэтгэж, зорчих хэсгийн хөдөлгөөн хэвийн үргэлжилж байна.

Ташрамд сануулахад 2024 оны гуравдугаар сарын 27-ны өдөр мөн энэ замд нэг дор 17 машин мөргөлдсөн зам тээврийн ноцтой осол гарч байсан юм. Иймд хөдөлгөөнд оролцогч иргэн та цаг уурын нөхцөлтэй уялдуулан зорчих хугацаагаа тодорхойлох, тээврийн хэрэгслийн бүрэн бүтэн байдлаа хангах, цаг уурын аюулт үзэгдэлтэй үед аль болох холын замд гарахгүй байхыг анхааруулъя.