Улаанбаатар серийн улсын дугаарыг тээврийн хэрэгсэлд олгох хүсэлтийг цахимаар авч эхэлсэн ч татвар, торгууль төлөөгүй, оношилгоонд ороогүй бол Улаанбаатар серийн дугаар олгох боломжгүй гэдгийг мэргэжилтнүүд хэллээ. Энэ тухай Автотээврийн хэрэгслийн бүртгэл, хяналтын төвийн дарга Э.Ниндэв хэлэхдээ “Тээврийн хэрэгслийн татвар, торгууль, авто зам ашигласны хураамжийг төлөөгүй, оношилгоонд ороогүй бол улсын дугаарын захиалгыг системд үргэлжлүүлэх боломжгүй. Өөрөөр хэлбэл улсын дугаар авах гэж байгаа тээврийн хэрэгслийг бидний хэлдгээр оношилгоонд буюу техникийн хяналтын үзлэгт заавал оруулсан байх ёстой” гэсэн байна.  

Тээврийн хэрэгсэлд Улаанбаатарын серитэй улсын дугаар олгох хүсэлтийг 2025 оны нэгдүгээр сарын 15-наас буюу өчигдрөөс carplate.ulaanbaatar.mn системээр авч эхэлсэн билээ. Өнөөдрийг хүртэлх хугацаанд 9000 гаруй иргэн тус системтэй танилцаад байна.

Иргэд тээврийн хэрэгслийн улсын дугаарыг дээрх системээр захиалахдаа “И-Монгол” ДАН системээр дамжиж, регистрийн дугаараа оруулснаар Улаанбаатарын иргэн мөн эсэхээ тодорхойлуулах юм. Ингэхдээ чухам хэдэд бүртгүүлснээр эрэмбэлэгдэхгүй тээврийн хэрэгслийн шалгуур үзүүлэлтээр эрэмбэлэгдэнэ. Хамгийн бага насжилттай, цахилгаан болон хайбрид хөдөлгүүртэй, зүүн гар талдаа жолооны хүрдтэй тээврийн хэрэгсэл хамгийн өндөр оноо авна. Энэ нь шалгуур үзүүлэлт болох юм.